«Ինջիրլիք» ավիաբազայի ամերիկացի զինվորականները գումարի դիմաց գնել են թուրք աղքատ ընտանիքների երեխաներին. «Սաբահ»

Այժմյան Թուրքիայի Ադանա նահանգում գտնվող «Ինջիրլիք» ավիաբազայի տարածքում ծառայություն իրականացնող ամերիկացի զինվորականները գումարի դիմաց տեղի անապահով ընտանիքներից գնել են երեխաներին։ Նման տեղեկություններ թուրքական լրատվամիջոցները ձեռք են բերել Ադանայում կատարած հարցուփորձից հետո:

Ինչպես գրում է թուրքական «Սաբահ» պարբերականը, տեղացիները քաջատեղյակ են տեղի ունեցածից, շատերը խոստովանել են, որ իրենք նույնպես նման առաջարկներ են ստացել, մինչդեռ նրանք հրաժարվել են վաճառել սեփական երեխաներին:

Այս մասին տեղեկություններ են տարածվել միայն վերջերս, երբ ադանացի քույր ու եղբայրը թուրքական հայտնի հեռուստահաղորդման միջոցով կարողացան գտնել ԱՄՆ-ում հայտնված իրենց երկու քույրերին:

«Ամերիկացի զինվորների կողմից թուրք երեխաներին գումարի դիմաց իրենց երկիր տանելու մասին տեղեկությունները ճիշտ են: Ես մի ծանոթ ունեմ` և՛ տղային, և՛ աղջկան վաճառեց: Մի օր էլ կինս ասաց, որ եկել են մեր երեխային տանելու, այդ պահին խենթացա: Մարդ իր ձագին ինչպե՞ս կվաճառի», – լրագրողներին պատմել է ավելի քան 40 տարի «Ինջիրլիքի» մոտակայքում ապրող ադանացի Մահմուդ Աչարը:

Նույն տարածքում բնակվող 65-ամյա Ալի Ասլանն էլ նշել է, որ ամերիկացիներն ընտրում էին հատկապես անապահով ընտանիքներին, հատուկ այդ նպատակով թաղամասերում ուսումնասիրություններ էին անցկացնում ԱՄՆ-ից ժամանած կանայք՝ տեղեկանալով, թե որ ընտանիքներն են առավել կարիքավոր:

Տեղի բնակիչները պատմել են, որ նման դեպքերը հատկապես տարածված են եղել 1980-90-ական թվականներին և այժմ, կարծես, դադարել են:

http://www.tert.am/am/news/2018/01/09/incirlik/2582996