Թուրքիայի հայությունը մեծ շուքով նշել է սուրբծննդյան տոները

Սուրբ Ծնունդը մեծ խանդավառությամբ նշվել է նաև Թուրքիայի հայության շրջանում, որտեղ այս տարի ևս սուրբծննդյան պատարագներ են մատուցվել տասնյակ հայկական եկեղեցիներում:

Համացանցում տարածվել է տեսանյութ, որում Ստամբուլի «Երեք խորան» հայկական եկեղեցու բակում տոնախմբությունն ուղեկցվում է հայկական ավանդական երգուպարով: Ելույթով է հանդես եկել Ստամբուլի հայկական «Մարալ» երգի ու պարի համույթը:

Ամանորի և սուրբծննդյան հատուկ համերգային ծրագրով է հանդես եկել նաև Ստամբուլի հայաշատ Սամաթիա թաղամասի «Սահակյան Դպրաց դաս» երգչախումբը:

Աղբյուրը նշում է, որ տոնական ծիսակարգեր են իրականացվել նաև Թուրքիայի հայկական մի շարք միություններում՝ պատրաստվել է ավանդական անուշապուրը, տաք գինին:

Ինչպես նշում է Ստամբուլի հայկական պարբերականներից «Ակօսը», այս տարի, ամեն տարվա պես, սուրբծննդյան պատարագ է մատուցվել ոչ միայն Ստամբուլի բոլոր հայկական եկեղեցիներում, այլև պատմական Կիլիկիայի որոշ հատվածներում. մասնավորապես՝ Իսքենդերունի հայկական «Քառսուն մանուկ» և Վագըֆ հայաբնակ գյուղի Սուրբ Աստվածածին եկեղեցիներում:

Դիարբեքիրի հայ համայնքը, սակայն, այս տարի ևս մնացել է առանց սուրբծննդյան պատարագի՝ Սուրբ Կիրակոսի շուրջ ստեղծված իրավիճակի պատճառով: 2012 թ. վերակառուցված և 2015 թ. թուրք-քրդական բախումների կիզակետում հայտնված ու ավերածության ենթարկված Սուրբ Կիրակոսի դռները շարունակում են փակ մնալ:

http://www.tert.am/am/news/2018/01/09/armenians-in-turkey/2582528