«Էրդողանը մարդասպան է». Ֆրանսիայում հայերն ու քրդերը միավորվել են Թուրքիայի նախագահի դեմ

ԵՐԵՎԱՆ, 7 հունվարի — Sputnik. Շաբաթ օրը` հունվարի 6-ին, Փարիզում հազարավոր քրդեր ու հայեր դուրս են եկել փողոց` իրենց դժգոհությունը հայտնելու Թուրքիայի նախագահ Ռեջեփ Թայիփ Էրդողանի այցի կապակցությամբ։ Այս մասին հայտնում է «Ֆրանսպրեսս»գործակալությունը։

Էրդողանը պաշոտնական այցով Փարիզ է մեկնել հունվարի 5-ին։

Ցուցարարները «Էրդողան` մարդասպան» գրությամբ պաստառներով ու վանկարկումներով անցել են Ֆրանսիայի մայրաքաղաքի փողոցներով` հիշեցնելով, որ 2013թ. Փարիզում սպանված երեք քուրդ ապստամբների սպանության համար մինչև այսօր ոչ ոք պատասխանատվության չի ենթարկվել։

Փարիզի փողոցներ դուրս եկած քրդերը ցավ են հայտնել, որ Ֆրանսիայի նախագահ Էմանուել Մակրոնն Էրդողանի հետ հանդիպման ժամանակ այս սպանությունների մասին չի հիշատակել։

Քրդերի կազմակերպած ակցիային միացել է նաև ֆրանսահայ համայնքը։ Հայերը Էրդողանին «բռնապետ» են անվանել։

«Ռեջեփ Թայիփ Էրդողանը ֆրանսիացիներին ցույց տվեց իր իսկական` բռնապետի դեմքը։ Ֆրանսիայի նախագահական պալատում նա այնպիսի դեմքով էր, կարծես չի խախտել եվրոպական չափանիշները, որոնց իբր հավակնում է հավատարիմ մնալ», — «Ֆրանսպրեսսի» փոխանցմամբ` ասված է Ֆրանսիայի հայկական կազմակերպությունների համակարգող խորհրդի հայտարարության մեջ։

2013 թ. հունվարին Փարիզում հայտնաբերվել էին քրդական աշխատավորական կուսակցության անդամ երեք կանանց գլխատված մարմինները։

Թուրքական ազգային հետախուզական գործակալությունը պաշտոնապես հերքել էր սպանություններին իր մասնակցությունը, մինչդեռ ֆրանսիացի քննիչների համոզմամբ, թուրքական լրտեսները կապ ունեն սպանությունների հետ։

Քուրդ կանանց սպանությունները մինչ բացահայտված չեն։ Միակ կասկածյալը` թուրք ազգայնական Օմեր Գյունեյը, բանտում մահացել է 2016 թ., մինչ գործը կհասներ դատարան։

https://armeniasputnik.am/world/20180107/10071187/erdoxan-hayer-qrder.html