Այժմյան Թուրքիայի տարածքում գտնվող Դիարբեքիրի (որի մեջ է մտնում նաև պատմական Տիգրանակերտի մի մասը – Tert.am) պատմական Սուր թաղամասում պետության կողմից շարունակվող քանդման աշխատանքների հետևանքով ոչնչացվել է հնագույն թաղամասերի 72 տոկոսը։ Այս եզրակացությանն են եկել Թուրքիայում գործող «Հնագետների ասոցիացիա»-ի անդամներն իրենց հատուկ հետազոտության արդյունքում:
Նրանք փաստել են, որ Սուրի հնագիտական կառույցների մեծ մասն այլևս քանդված է, մի շարք պատմական կառույցների գոյությունն էլ մնում է հարցականի տակ:
Բանն այն է, որ չնայած այս տարածքում «Քրդստանի աշխատավորական կուսակցություն» խմբավորման գրոհայինների ու թուրքական ԶՈւ-ի հատուկջոկատայինների միջև բախումների դադարեցմանը, Սուրի 5 մեծ թաղամաս դեռևս շարունակում է փակ մնալ այցելուների համար:
Փորձագետները ենթադրում են, որ քանդման աշխատանքներից հետո ավերված շենքերի փլատակների տակից դուրս են գալու բազմաթիվ պատմական նշանակություն ունեցող գտածոներ:
Թուրք-քրդական բախումների հետևանքով խոշոր ավերածությունների ենթարկված Սուրի շրջանում ռազմական գործողություններից տուժել է ավելի քան 40.000 խաղաղ քաղաքացի: Հիշեցնենք, որ Սուրում թուրքական հատուկ ուժերի գործողություններն սկսվել էին 2015թ. սեպտեմբերի 6-ին և ավարտվել 2016թ. մարտի 10-ին: Սուրի աղետի պատճառով ավերածության է ենթարկվել շրջանի շուրջ 29.000 թաղամաս:
Նշենք, որ 2016թ. պետականացված գույքի ցուցակում էր հայտնվել նաև հայկական Սուրբ Կիրակոս եկեղեցին, որը, սակայն, ավելի ուշ հաջողվեց վերադարձնել մշակութային հիմնադրամին, որին եկեղեցին պատկանում էր մինչ բռնի պետականացումը:
http://www.tert.am/am/news/2018/01/08/sur/2581674
Leave a Reply