Այս տարի Թուրքիայում Սուրբ Ծնունդը դիմավորում ենք է՛լ ավելի փոքր թվով և է՛լ ավելի շատ անվտանգության աշխատակիցների ներկայությամբ. Սելինա Դողան

Թուրքիայի ընդդիմադիր Ժողովրդահանրապետական կուսակցության անդամ, խորհրդարանի հայազգի պատգամավոր Սելինա Դողանը թուրքական Gazeteduvar.com.tr կայքին տված հարցազրույցում ամփոփել է 2017 թ. Թուրքիայի կարևոր քաղաքական իրադարձությունները:

ՍՏԵՓԱՆԱԿԵՐՏ, 7 հունվարի, ԱՐՑԱԽՊՐԵՍ: Դողանը նկատել է, որ որ անցած 2017 թվականը Թուրքիայում նշանավորվել է որպես ընդդիմության դեմ առավել ինտենսիվ ճնշումների, արդարադատության համակարգի՝ իշխանություններին ծառայեցված լինելու և մի շարք այլ անօրենությունների տարի։

Ըստ հայազգի պատգամավորի՝ գլխավոր քաղաքական իրադարձությունը Սահմանադրական փոփոխությունների հանրաքվեի անցկացումն էր, որն իրականացվեց արտակարգ դրության պայմաններում, և չնայած ընտրողների ուղիղ կեսի՝ դրան դեմ լինելուն, փոփոխությունների փաթեթն անցկացվեց:

«Թուրքիան մարդկային առումով կորցրեց իր արժեքները», – Tert.am-ի փոխանցմամբ՝ համոզված է Դողանը:

Նա նաև շեշտել է, որ է՛լ ավելի լարված իրավիճակում են հայտնվել կրոնական փոքրամասնությունները, որոնց անվտանգության խնդիրն օր օրի առավել խրթին է դառնում, իսկ հայ ու մյուս քրիստոնյա համայնքների թիվը գնալով նվազում է:

«Այս տարի Սուրբ Ծնունդը դիմավորում ենք է՛լ ավելի փոքր թվով և անվտանգության աշխատակիցների է՛լ ավելի մեծ ներկայությամբ», – եզրափակել է հայազգի պատգամավորը:

http://artsakhpress.am/arm/news/78725/ays-tari-turqiayum-surb-tsnundy-dimavorum-enq-e%D5%9Bl-aveli-poqr-tvov-ev-e%D5%9Bl-aveli-shat-anvtangutyan-ashkhatakicneri-nerkayutyamb-selina-doxan.html