Փարիզի դատարանն արդարացրել է Ցեղասպանությունը ժխտող ֆրանսիացուն «վիրավորած» Արա Թորանյանին

Փարիզի դատարանն արդարացրել է «Nouvelles d’Arménie» լրատվական կայքի գլխավոր խմբագիր Արա Թորանյանին՝ Հայոց ցեղասպանության փաստը ժխտելու համար ֆրանսիացի հետազոտող Մաքսիմ Գաուինին վիրավորելու գործով:

Նշվում է, որ 2017թ. հոկտեմբերին Թուրքիայի կողմից ֆինանսավորվող Գաուինը դատական հայց էր ներկայացրել Թորանյանի դեմ՝ ԶԼՄ-ներում իրեն զրպարտելու ու հրապարակավ վիրավորելու համար:

Հայցվորը մեջբերել էր «Nouvelles d’Arménie»-ի 2013 և 2014թթ. հրապարակումները, որոնցում ֆրանսիացի հետազոտողը համեմատվել էր հրեաների Հոլոքոստը հերքող, գրող Ռոբեր Ֆորիսոնի հետ:

Բացի այդ՝ կայքը Գաուինին բնորոշել էր որպես «թուրքական ֆաշիզմի հավատարիմ ծառայող»: Հայտնի է, որ նման հրապարակումների համար հիմք է հանդիսացել ֆրանսիացու հայտարարությունն առ այն, որ «1915-1918թթ. տեղահանված հայերին շատ լավ կերակրում էին ու, ընդհանուր առմամբ, նրանց շատ լավ էին վերաբերվում թե՛ տեղահանումների ընթացքում, թե՛ դրանից հետո»:

Այժմ դատարանն արդարացրել է Թորանյանին՝ նրա գործողություններում հանցավոր որևէ տարր չհայտնաբերելով:

Դատական նիստի ավարտից հետո Թորանյանը հայտարարել է «Հայոց ցեղասպանության փաստը հերքող տխրահռչակ մարդու նկատմամբ տարած հաղթանակի մասին»:

http://www.tert.am/am/news/2017/11/30/toranian/2552741