Վանի և Էրզրումի բնակչության կրթամակարդակն ամենացածրն է

Թուրքիայի Փամուքքալե համալսարանն ուսումնասիրություններ է կատարել երկրի շրջանների բնակչության կրթամակարդակը պարզելու համար:

Ըստ թուրքական «Haberler» լրատվամիջոցի՝ ուսումնասիրվել է մասնավորապես այն, թե 25 տարեկանից բարձր քաղաքացիները քանի տարի են կրթություն ստացել նախակրթական և միջնակարգ հաստատություններում:

Ինչպես 2009թ., այնպես էլ 2015թ. Թուրքիայի ամենակրթված շրջանները հանդիսանում են Ստամբուլ նահանգի Բեշիքթաշ և Քադըքյոյ շրջանները և Անկարայի Չանքայա շրջանը:

Հայտնի է դարձել, որ 2009թ. Բեշիքթաշում և Չանքայայում աշակերտները միջնակարգ դպրոցներում սովորել են 8.5 տարի, իսկ Քադըքյոյում` 8.4 տարի:
2015թ. վերոնշյալ շրջաններում աշակերտները արդեն սովորել են համապատասխանաբար՝ 9.1 և 9.3 տարի (Քադիքյոյ, Չանքայա):

2015թ. արդյունքներից պարզվել է նաև, որ կրթվածության մակարդակով ամենացածր ցուցանիշները գրանցվել են Վանի Բահչեսարայ, Սղերդի Փերվարի, Ադըյամանի Գերգեր և Էրզրումի Թեման շրջաններում:

Այդ շրջաններում 2009թ. աշակերտները տարրական դպրոցներում սովորել են ընդամենը 1.8 տարի, իսկ այնուհետև դադարեցրել են ուսումը: 2015թ. նույն այդ շրջաններում աշակերտները տարրական դպրոցներում սովորել են արդեն 3.3 տարի:

Ermenihaber.am