Ոստիկանության տեսագրությունները հակասում են Սոյլուի ասածներին: Հարձակվողները «հայեր» են բղավում

Բարըշ Բոյրազ

«Mezopotamya» գործակալությանը հաջողվել է  ձեռք բերել Թուղլուք Խաթունի աճյունի վրա հարձակում գործած անձանց վերաբերյալ ոստիկանության տեսախցիկների տեսագրությունները: Այդ տեսագրություններն ապացուցում են, որ Ներքին գործերի նախարար Սոյլուն ստում էր, երբ ասում էր. «Ոստիկանության բաժանմունքում դիտել եմ տեսագրությունները: «Այստեղ հայ չենք թաղի» ու նման այլ արտահայտություններ չկան»:  ԺԴԿ-ի նախկին փոխնախագահ, այժմ ձերբակալված Այսել Թուղլուքի մոր` Թուղլուք Խաթունի աճյունի վրա սեպտեմբերի 13-ին Անկարայի Գյոլբաշըի շրջանում գտնվող Ինջեքի գերեզմանոցում տեղի ունեցած հարձակման ժամանակ ոստիկանության տեսագրությունները «Mezopotamya» գործակալությանը հաջողվել է ձեռք բերել: Այդ տեսագրություններում, որոնք որպես ապացույցներ ներկայացվել են նաև դատարան,  հարձակում գործող անձինք գերեզմանոցի դռնից ներս են մտնում ու տարբեր կոչեր հնչեցնում: Վիրավորական խոսքեր ու հայհոյանքներ տեղալով՝ հարձակում գործող անձինք բղավում են. «Այս գերեզման այսօր այստեղից հանվելու է»:

Տեսագրություններն ապացուցում են, որ Սոյլուն ստում էր

Հարձակման ժամանակ լսվում են աճյունի տեր Թուղլուք ընտանիքին և հուղարկավորության մասնակիցներին սպառնալից տոնով ուղղված «հայերը» բղավոցներ: Հարձակումից հետո Ներքին գործերի նախարար Սոյլուն պնդել էր հետևյալը. «Ոստիկանության բաժանմունքում դիտել եմ տեսագրությունները: «Այստեղ հայ չենք թաղի, այստեղ ալևի չենք թաղի»-ի նման արտահայտություններ չեն արվել»: Հարցաքննությունների ժամանակ տրված ցուցմունքներն էլ են հակասում Սոյլուին:

Արագ արձագանքման ուժերի ղեկավարը «ընկերներ»-ով է դիմում

Տեսագրություններից մեկում հարձակվողներից մեկը գոռում է. «Այդ աճյունը հանելու եք, այն այստեղ չենք ուզում», իսկ մեկ այլ անձ, ով իրեն ներկայացնում է որպես արագ արձագանքման ուժերի ղեկավար, հարձակվողներին դիմում է «ընկերներ»-ով ու   զգուշացնում. «Լսե՛ք, ես արագ արձագանքման ուժերի ղեկավարն եմ, խնդրում եմ` հեռացե՛ք այստեղից»: Ուշագրավ է  ոստիկանության կոմիսար ներկայացող մեկ այլ ոստիկանի` հաձակվող անձանց արված «Ձեզ սազական ձևով ցույց արեք» արտահայտությունը:

Տեսագրություններում ուշագրավ է նաև այն փաստը, որ ոստիկանության աշխատակիցները, փոխանակ հարձակվողներին հեռացնեն դեպքի վայրից, ասում են. «Ձեզնից մի բան ենք խնդրում. մինչ համապատասխան այրերը չգան՝ որևէ քայլ մի՛ ձեռնարկեք, սպասե՛ք» ու որևէ քայլ չեն ձեռնարկում նրանց խոչընդոտելու համար: Հարձակվողներն էլ, ի պատասխան ոստիկանների այդ խոսքերին, ասում են. «Մենք էլ ձեզնից մի խնդրանք ունենք», ապա, աճյունի տերերին մատնանշելով, ասում են. «Այնտեղի 3-5 կնիկները թող չխոսեն ու այստեղ գտնվողներին չանհանգստացնեն»: Տեսանյութերի մեկ ուրիշ բաժնում հարձակում գործող անձինք գորշ գայլերի նշանն են ցույց տալիս ու բղավում. «Յա Ալլահ բիսմիլլահ, ալլահուէկբեր» (Ալլահը մեծ է):

Ձեռքներին կտրող-ծակող գործիքներ ունեցողները տեսագրություններում չեն երևում

Ոստիկանական տեսախցիկի ֆիքսած մի ձայնագրությունում մեկն ասում է. «Ուշադի՛ր եղեք, ոմանց ձեռքին ձեռնափայտ կա»: Չնայած  ոստիկանները գիտեին, թե ում մոտ սառը զենք կար, նրանց դեմ քայլեր չեն ձեռնարկում: Ոստկանները ձեռքներին քար ունեցողներին ուղղակի ասում էին. «Քար մի՛ վերցրեք»: Սակայն ոչ ձեռքներին քար ունեցողները, ոչ էլ ձեռնափայտ ունեցողները չեն երևում տեսագրություններում, ինչը խնդրի մեկ այլ կողմն է: Մյուս կողմից  էլ՝ հարձակում գործած անձինք դատարանում իրենց տված ցուցմունքներում պնդել են, որ ձեռքներին քար չի եղել:

Խորը վիրավորանքներ

Հարձակվող խումբից մեկը, ում «Բարըշ» էին կոչում, աճյունի տերերի վրա բղավելով, ասում է. «Սա իմ գերեզմանատունն է, ի՞նչ եք կանգնել, դո՛ւսր եկեք այստեղից»: Նույն մարդը մի քանի տեղերում  ամբոխին դրդում է, որ հայհոյեն: Դրանից հետո սպառնում է՝ասելով. «Դուք գնացեք, կտեսնեք, թե գերեզմանը այդտեղից ինչպես է հանվելու»: Ուշագրավ է նաև, որ նման սպառնալիքներ տեղացող Բարըշ անունով անձի դեմ դատական հայց չի ներկայացվել:

Գերեզմանոց մուտքը չի խոչընդոտվել

Դատարանում մեղադրյալները իրենց պաշտպական ճառերում  պնդել են, որ գերեզմանոցից ներս չեն մտել, սակայն տեսագրություններում երևում է, որ հարձակվողներն անցնում են գերեզմանոցի պատերի վրայով ու ներս մտնելով`ռասիստական բնույթի կոչեր հնչեցնում: Այնտեղ երևում է նաև, որ ոստիկանությունը չի խոչընդոտում հարձակողների` գերեզմանոց ներս խուժելուն:

Հարձակվող անձ` քաղաքից մարդ է գալու

Մուրադ Ալփը, ով հրապարակել էր նախարար Սոյլուի հետ ունեցած նկարը, գերեզմանոցի պատի վրա կանգնելով, բղավել է. «Քաղաքից մարդ է գալու» ու ամբոխին հորդորել է չհեռանալ: Կարճ ժամանակ անց Ալփը  ոստիկանների հետ դեմ առ դեմ դուրս չգալու նպատակով ասում է. «Ոստիկաններին ղուրբան լինեմ, ոստիկանների աչքերին ղուրբան լինեմ»: Հավաքվածներին գերեզմանոցի մոտ շատ չսպասեցնելու համար Ալփը նախ մի հեռախոսազրույց է ունենում:

Ոստիկանություն. «Որևէ մեկիդ չենք խանգարել»

Տեսագրություններից մեկում գրեթե հարձակման վերջում քաղաքացիական մի ոստիկան ասում է. «Տեսեք, մինչ այժմ որևէ մեկիդ չենք խանգարել»: Իսկ նախարար Սոյլուն էլ դեպքից հետո արված հայտարաությունում պնդել է. «Հարձակվողներին անմիջապես անհրաժեշտ դիմադրություն է ցույց տրվել»:

Տեսագրությունները կտրվա՞ծ են 

Տեղի ունեցած այսպիսի դեպքը ոստիկանների կողմից պետք է ամբողջությամբ տեսագրվեր: Սակայն դեպքի վերաբերյալ դատարան ուղարկված և ապացույցներ հանդիսացող տեսագրություններից պարզ է դառնում, որ այնտեղ առկա են կիսատ մասեր: Հարց է ծագում՝ «Մի՞թե տեսագրությունները կտրված են»: Ոստիկանության կողմից նկարահանված տեսագրություններում երևում է, որ Թուղլուք Խաթունի հուղարկավորության ժամանակ մի մեքենա է դուրս գալիս: Դրանից անմիջապես հետո նույն տեսախցիկը տեսագրում է արդեն դատարկ գերեզմանը:

Ի՞նչ էր եղել

Անկարայում դատապարտված ԺԴԿ նախկին փոխվարչապետ, նախկին պատգամավոր Այսել Թուղլուքի մոր` Թուղլուք Խաթունի աճյունը սեպտեմբերի 13-ին Բաթըքենթում գտնվող Էրգազի Փիրսուլթան ջեմեվիում կատարված հոգեհանգստյան արարողությունից հետո բերում են  Գյոլբաշըին կից Ինջեք թաղամասում գտնվող գերեզմանոց` հողին հանձնելու: Հուղարկավորությանը մասնակցում էին նաև ԺԴԿ-ից պատգամավորներ ու պաշտոնյաներ,  Քանդըրայի բանտից թույլ էին տվել, որ մոր հուղարկավորությանը մասնակցի նաև բանտարկված Այսել Թուղլուքը:

Այսել Թուղլուքի` բանտից ուշ ժամի գալու պատճառով, որոշել էին մորը ուշ ժամի հուղարկավորել: Հուղարկավորության ժամանակ մի խումբ ծայրահեղականներ քարերով ու փայտերով հարձակվել էին հուղարկավորության մասնակիցների վրա: Չնայած տարածքում ոստիկաններ են եղել, հարձակումը շարունակվել է, որի պատճառով Թուղլուքի ընտանիքը աճյունը հանել է գերեզմանից ու հետ բերել Էրգազի Փիրսուլթան ջեմեվի: Դրանից հետո աճյունը տարվել է Թուղլուք Խաթունի ծննդավայր` Դերսիմ ու այնտեղ հանձնվել հողին:

http://mezopotamyaajansi.com/tum-haberler/content/view/6187

Թարգմանեց Անի Մելքոնյանը