Մալաթիայում ալևիները երթ են կազմակերպել` ի նշան բողոքի՝ ալևիների տների վրա արված նշանների համար

Մալաթիայում բնակվող ալևիները երթ են կազմակերպել` ի նշան բողոքի իրենց տան դռներին արված նշանների ու հայտարարել են. «Երբեք ծնկի չենք եկել, ծնկի չենք գալու»:

Փիրսուլթան Աբդալ մշակութային միության (PSAKD) գլխավորությամբ կազմակերպված երթին մասնակցել են նաև քաղաքական կուսակցության, այլ միավորումների ու քաղաքացիական հասարակության կազմակերպության տարբեր ներկայացուցիչներ` ի նշան բողոքի՝ Մալաթիայի Ջեմալ Գյուրսել թաղամասում ալևիների 13 տների վրա արված նշանների համար:

Ալևիներին այս նշանը հայտնի է Մարաշից

Թաղամասում հայտարարությամբ հանդես եկած PSAKD-ի Մալաթիայի մասնաճյուղի ղեկավար Մեհմեթ Թոփալն ասել է, որ Մարաշի ջարդերի ժամանակ էլ են զոհերի տների վրա նշաններ արվել: Նա նաև նշել է, որ այդ նշանները տեսնելը իրենց չի զարմացրել, քանի որ դա առաջ էլ են տեսել` Մարաշի ջարդերի ժամանակ. այդ առնչությամբ ասել է. «Մենք` ալևիներս, այս նշանը առաջին անգամ չէ, որ տեսնում ենք, ավելի վաղ Էրզինջանում, Անթեփում ու Ադըյամանում էլ ենք տեսել: Այս ամենից այլևս չեն զարմանում: Դեռ մեր հիշողության մեջ վառ են Ադըյամանում դռներին արված նշանների առթիվ Ներքին գործերի նախարարի ասածները: Այդ ժամանակվա նախարարն ասել էր. « Դռների վրա երեխաներն են նշան արել» ու այսպիսով դեպքն համարել աննշան երևույթ: Այնուհետև տեսախցիկների տեսագրությունները ջնջվել էին, իսկ ֆայլերը` թաքցվել: Վաղն էլ Մալաթիայում այս նշաններն անողների վերաբերյալ կասեն. «Անհայտ երեխաների կամ մի չարաճճիի ձեռքի գործն է»: Գիտենք նաև, որ  դեպքը չնչին մի բան կհամարեն  և կթաքցնեն հետքերը»:

Վախի մեջ ենք ապրում

Ջեմալ Գյուրսել թաղամասում 13 տների դռների վրա նշաններ անողները անցած անգամվա նման չեն բացահայտվի, չեն պատժվի, և սա առաջին և վերջին դեպքը չի լինի»,- ասել է Թոփալն ու ավելացրել. «Այս նշանները անելիս այդ երեխաները վստահելի տեղից են թույլտվություն ստացել: Իսկ այդ երեխաների` իշխանավորների ասած՝ «չարաճճի երեխաներ»-ի նկատմամբ իրավական ու պատժիչ նորմերը  չեն գործում: Ապրում ենք մի իրականության մեջ, որտեղ չեն հարգվում մարդու հիմնական իրավունքներն ու ազատությունները, որտեղ սեփական իրավունքները պաշտպանելը հանցանք է համարվում, օրենքները չեն գործում, փողոցներում ռումբեր են պայթում, հրապարակներում լինչի դատաստան են տեսնում, լրատվական դաշտում աճպարարությունն է իշխում. այս ամենը վախի մթնոլորտ է ստեղծել: Մի խոսքով` ԱԶԿ-ն Թուրքիան սեխմել է  հեղաշրջման փորձի ու արտակարգ դրության միջև ու երկիրը կանգնեցրել փակուղու առջև:»

Վիզ չենք ծռի, չենք հանձնվի

Թոփալն ասել է, որ այդ հարձակումը գործել են ալևիների թշնամի, պահպանողական, ֆաշիստ անձինք և ավելացրել. «Երբեք չպետք է մոռանալ, որ մեզ` ալևիներիս, ինչքան էլ ճնշեն, ինչքան էլ հալածեն, միևնույն է, մենք երբեք վիզ չենք ծռի, չենք հանձնվի: Երբեք ծնկի չենք գա: Եթե չգիտեն սա, թող պատմության գրքերը բացեն ու Քալենդեր Չելեբիի, Փիր Սուլթանի, Սեյիդ Ռըզայի մասին կարդան: Պատմության ընթացքում իրականացված հալածանքները, ջարդերը մեզ մեր ճանապարհից չեն շեղել, սրանից հետո էլ չի շեղելու»:

https://www.artigercek.com/malatya-da-evleri-isaretlenen-aleviler-yurudu

Թարգմանեց Անի Մելքոնյանը