Ստամբուլահայ լրագրող, ժողովրդական դիվանագետ Րաֆֆի Հերմոն Արաքսի խոսքով՝ Պոլսո պատրիարքական ընտրությունների անորոշություն մտնելու պատճառները պետք է փնտրել ոչ թե թուրքական իշխանությունների քաղաքականության, այլ՝ համայնքում առաջացած պառակտման մեջ:
Նա Tert.am-ի հետ զրույցում նկատեց, որ Հայաստանում և սփյուռքի որոշ հատվածներում տպավորություն է ստեղծվել, որ Թուրքիայի իշխանությունները, առավոտից մինչև գիշեր, չեն ուտում, չեն քնում, պատրիարքական ընտրությունների մասին են մտածում:
«Դա թյուրիմացություն է և սխալ ինֆորմացիա է»,- ասաց նա՝ հավելելով, որ Թուրքիան շատ ավելի առաջնահերթ խնդիրներ ունի լուծելու, և այդքան «գլխացավանքների» մեջ չի ցանկանա Հայոց պատրիարքական ընտրությունները խափանելով՝ բացասական տպավորություն ստեղծել իր շուրջը:
Րաֆֆի Հերմոն Արաքսը պնդեց՝ Պոլսո պատրիարքական ընտրությունների հետ կապված ներկայիս վիճակը համայնքից է բխում. «Պապից ավելի պապական լինելու հարց է սա: Համայնքի մեջ որոշ ինքնակոչներ, հարս ու փեսա իրենց կոչողներ, ասում են, որ պետությունն իրենց չի արտոնում, որ «կանաչ լույս» չի վառում այս կամ այն թեկնածուի առջև»,- ասաց նա՝ նկատելով, որ իրականում Թուրքիայի իշխանություններն արտոնություն էլ չունեն արգելելու համայնքին՝ պատրիարք ընտրելու հարցում, պարզապես պետք է տեղյակ պահել երկրի Ներքին գործերի նախարարությանը:
Պատասխանելով դիտարկմանը, թե հիմա ամեն ինչ արվում է որոշ շրջանակների կողմից, որ Պոլսո պատրիարքարանում տիրի նույն իրավիճակը, ինչ մինչև տեղապահ ընտրելն էր, այսինքն՝ Արամ Աթեշյանն ու Սահակ Մաշալյանը շարունակեն նույն կերպ աշխատել, իսկ Գարեգին Բեքչյանը հեռանա, Րաֆֆի Հերմոն Արաքսը նշեց, որ դա արդեն պոլսահայ համայնքում մեծ տագնապ կառաջացնի. «Հավատացեք, մեծ տագնապ, որովհետև եթե համայնքի մեծամասնության կողմից ցանկալի պատրիարք չընտրվի, արդեն դե ֆակտո, գրեթե փլուզման եզրին հայտնված համայնքը դե յուրե տագնապի մեջ կհայտնվի»,- ասաց նա:
Նա հավանական չի համարում, որ այս տարի կլուծվի պատրիարքական ընտրությունների հարցը, և ակնկալում է, որ այն կլուծվի Թուրքիայի նախագահ Ռեջեփ Թայիփ Էրդողանի միջամտության արդյունքում՝ Թուրքիայում սպասվող ընտրությունների ֆոնին: «Սպասում եմ, որ Էրդողանն իրեն ծառայելուն հակված հայ համայնքի շրջանակներին ասի՝ ընկեր ջան, մինչև այսօր իբրև թե ինձ ծառայելու համար որոշ հետաձգումներ արեցիր, այսօր այլևս քո արածները պետք չեն, ուրեմն հետ քաշվիր, թող համայնքն իր ընտրություններն անի»,- ասաց նա:
Leave a Reply