Թուրքիայում հայոց պատրիարքի տեղապահ Աթեշյանը իր ծննդավայում է` Սիլվանում

Ինչպես հաղորդում է թուրքական haberler.com կայքը, Թուրքիայում հայոց պատրիարքի տեղապահ արքեպիսկոպոս Արամ Աթեշյանը Դիրաբեքիրի Սուրի Սուրբ Կիրակոս եկեղեցին ու նորոգման մեջ գտնվող մյուս եկեղեցիները տեսնելու նպատակով Դիարբեքիրում գտնվելու ժամանակ այցելել է նաև իր ծննդավայր Սիլվան (պատմական Տիգրանակերտի տարածքում-ակունք խմբ.): Նա այցելել է նաև նահանգապետ Ադեմ Չելիքի նստավայր: Վերջինս նրան պատմական նշանակություն ունեցող պղնձե պատկերազարդ մի ափսե է նվիրել: Դրանից հետո Աթեշյանն այցելել է նաև այդ քաղաքում որպես մզկիթ գործող նախկին եկեղեցի: Նա նշել է, որ մայրը Հազրո գյուղից է եղել, իսկ հայրը` Լիջե գյուղից: «Ես 4 տարեկան էի, երբ ողջ ընտանիքով Սիլվանից հեռացանք ու Դիարբեքիրում հաստատվեցինք: Սեպտեմբերի 6-7 դեպքերի պատճառով ստիպված եղանք հեռանալ Սիլվանից: Մենք 1960 թ. տեղափոխվեցինք Դիարբեքիր: Ես հաճախել եմ Դիարբեքիրի նախակրթարան: 1966 թ. գնացել եմ Ստամբուլ, 1967 թ.՝ Երուսաղեմ ու այնտեղ 9 տարի սովորել: 1 տարով էլ Հոլանդիա եմ գնացել, այնուհետև վերադարձել եմ Ստամբուլ ու հոգևոր ծառայության անցել: Ինչքան էլ որ Ստամբուլում ապրեմ, միևնույն է, Դիարբեքիրից ու Սիլվանից չեմ կտրվում, մի բան միշտ ինձ ձգում է այստեղ»,- ասել է նա: Աթեշյանը նաև ավելացրել է, որ Սիլվանն այլևս նախկին Սիլվանը չէ, ինչպես որ Դիարբեքիրը նախկին Դիարբեքիրը չէ, ապա նշել, որ շատ կցանկանար, որ այնտեղ ապրող ժողովուրդները նախկինի պես եղբայրաբար ապրեին:

Akunq .net