Գերմանիայում կոչ են արել հուշարձաններ կանգնեցնել Օսմանյան կայսրությունում իրականացված ցեղասպանությունների զոհերի հիշատակին

Գերմանիայում գործող «Վտանգված ժողովուրդներ» իրավապաշտպան կազմակերպությունը կոչ է արել Օսմանյան կայսրությունում Առաջին համաշխարհայինի տարիներին սպանված հայերի ու այլ քրիստոնյա ժողովուրդների զոհերի հիշատակին նվիրված հուշարձաններ կանգնեցնել գերմանական քաղաքներում, այս մասին գրում է գերմանական Deutsche Welle-ի թուրքալեզու ծառայությունը:
Հայտնի է, որ վերոնշյալ պահանջ-նամակն արդեն փոխանցվել է կոնգրեսի նախագահ Եվա Լոհսեին:
«Շատ կարևոր է ջանքեր գործադրել, որպեսզի այստեղ ապրող հայերին և մյուս տուժած ժողովուրդների ներկայացուցիչներին թույլ չտանք մոռանալ կատարվածը, և հատկացնենք  նրանց մի վայր, որտեղ նրանք կկարողանան հարգանքի տուրք մատուցել զոհերի հիշատակին», – ասված է նամակում:
Կազմակերպությունը շեշտել է, որ, հայերից բացի, դա շատ կարևոր է նաև Գերմանիայում ապրող ասորիների ու քելդանիների համայնքների ներկայացուցիչների համար:
Հիշեցնենք, որ անցյալ տարի Գերմանիայի Բունդեսթագը պատմական քվեարկությամբ ցեղասպանություն է ճանաչել 1915 թվականին Օսմանյան Թուրքիայում իրականացված հայերի կոտորածները:

http://www.tert.am/am/news/2017/11/15/germany/2540132