Թուրքական «Kayserihaber» լրատվականն անդրադարձել է Կայսերի քաղաքի Էրջիյես համալսարանի հայագիտության ֆակուլտետի գործունեությանը: Ֆակուլտետի դասախոս պրոֆեսոր Գաֆֆար Մեհդիևը խոսել է Թուրքիայում հայերեն լեզվի ուսուցման կարևորության մասին:
Մեհդիևը նշել է, որ ամեն տարի ֆակուլտետի ուսանողների թիվն աճում է, և չնայած 2010-ին 6 ուսանողով են սկսել, այսօր ֆակուլտետում սովորում է 26 ուսանող:
Մեհդիեւը նշել է, որ երկրում հայերենի իմացությամբ մասնագետների մեծ պահանջարկ կա. «Թե Թուրքիայի արխիվները, թե պետական տարբեր կառույցները հայերեն իմացող մասնագետների կարիք ունեն: Մասնագետներն անհրաժեշտ են նաև հայ-թուրքական հարաբերությունների մասով աշխատելու համար: Ինչպես նաև կան բազմաթիվ գրական ստեղծագործություններ, որոնք պետք է հայերենից թուրքերեն և թուրքերենից հայերեն թարգմանել»:
Հարցին, թե ուսանողներն ինչու են ընտրում հայագիտության ֆակուլտետը, Մեհդիևը պատասխանել է, որ ուսանողների մեծ մասն ընտրում է ֆակուլտետը հայերեն սովորելու, հայալեզու փաստաթղթերը կարդալու, ուսումնասիրելու համար: Ըստ Մեհդիևի, ֆակուլտետում սովորողներից մեկն էլ ծագումով հայ է, որը լեզուն չգիտի եւ որոշել է սովորել:
Կայսերի քաղաքի Էրջիյես համալսարանը Թուրքիայի միակ ԲՈՒՀ-ն է, որը հայագիտության ֆակուլտետ ունի:
Leave a Reply