Պոլսահայ մտավորական, լեզվաբան Սևան Նշանյանն իր nisanyan1.blogspot.am բլոգում այս անգամ խոսել է Թուրքիայի նախագահ Ռեջեփ Թայիփ Էրդողանի քաղաքական ուղուց՝ խոստովանելով, որ ի սկզբանե հավատացել ու աջակցել է նրան:
Ավելին՝ Նշանյանը համոզված է, որ Հայկական հարցի լուծման գործում նույնպես Էրդողանը մեծ ու անկեղծ ջանքեր է գործադրել, սակայն չի հաջողել, քանի որ ավելի մեծ ուժերի ճնշման տակ նախընտրել է իր ու իր ընտանիքի բարեկեցիկ կյանքը:
«Ես հավատում եմ, որ թեկուզ մինչև որոշակի կետ Էրդողանն անկեղծ է եղել: Ես աջակցում էի նրան, ձայնս էլ նրան եմ տվել, եթե այսօր ժամացույցի սլաքները շրջենք 2007 կամ 2009 թվականներ՝ նորից նույն բանը կանեմ», – գրել է Նշանյանը:
Ըստ նրա՝ Էրդողանը երազում էր պատմության մեջ մտնել որպես քրդաբնակ նահանգներ խաղաղություն բերած մարդ:
«Եվրոպական միությանն անդամակցության քաղաքականության հարցում անկե՞ղծ էր՝ չգիտեմ: Բայց այն, որ քրդական, կիպրոսյան ու հայկական հարցերի լուծման համար անկեղծորեն ջանք է գործադրել՝ վստահ եմ: Գիտեմ, որ ընդհուպ 2014 թվականի առաջին ամիսները երազում էր պատմության մեջ մտնել որպես քրդական նահանգներ խաղաղություն բերած մարդ: Սակայն իր երազանքն իրականացնելու համար համապատասխան քաջություն, ուժ և աշխատակազմ չուներ», – գրել է Նշանյանը՝ շեշտելով նաև Թուրքիայի նախկին վարչապետ Ահմեթ Դավութօղլուի անունը, որն ըստ հայ մտավորականի՝ «երրորդ դասակարգի» մտածող էր, և հենց նրա նմաններն են շրջապատել Էրդողանին նման կարևոր ժամանակաշրջաններում:
Ավելին՝ ըստ Նշանյանի՝ Էրդողանը մինչ 2007 թվականը պայքարել է Թուրքիայի պետական կառուցվածքի «քաղցկեղային» դրսևորումների դեմ, մինչդեռ չհաջողեց:
«Գուցե կամքը չհերիքեց, գուցե հասկացավ, որ այդ քաղցկեղը վիրահատությամբ բուժվող բան չէ, քանի որ պատել է ամբողջ օրգանիզմը: Գուցե և չվստահեց իր դաշնակիցներին և տեսավ, որ կարող են իրեն դավաճանել: Կարծում եմ, որ շրջադարձային կետը 2010 թվականի սեպտեմբերի հանրաքվեից անմիջապես հետո էր, հենց այդ օրերին սկսվեց Ռեջեփ Թայիփ Էրդողանի «մահվան թռիչքը», – գրում է Նշանյանը՝ նկատի ունենալով Էրդողանի ներքին ու արտաքին քաղաքականության կտրուկ փոփոխություններին հետևած այն իրադարձությունները, որոնք Թուրքիան բերեցին այսօրվա վիճակին:
«Գնդակի ուղղությունը փոխեց 180 աստիճանով, համագործակցեց նրանց հետ, ովքեր մինչ այդ երազում էին նրան և իր ընտանիքին ծուղակը գցել: Նա հրաժեշտ տվեց իր կյանքի նախագիծը համարվող քրդական խաղաղության ծրագրին, երկիրը ծածկվեց արյամբ ու դրոշակներով, Եվրոպան, իսկ այնուհետ ԱՄՆ-ն թշնամի հայտարարվեցին: Իսկ ամենակարևորը՝ գյուլենական զինվորականությանը բանակից դուրս մղելու նախագծի կանաչ լույսը վառվեց: Փոխարենն ի՞նչ ստացավ. միանձնյա իշխանություն ու իր և իր ընտանիքի ճոխ կյանքի թույլտվություն», – շարունակում է Նշանյանը:
Ըստ նրա՝ Էրդողանը, որը պետք է որ լիներ սպասվող հեղաշրջման առաջին զոհը, այժմ ինքն է առաջնորդում անուղղակի հեղաշրջումը:
Սակայն պոլսահայ գործիչը համոզված է, որ Թուրքիան չի կարող հաղթել այս «պատերազմը», ինչպես չհաղթեցին Հիտլերը, Սադամ Հուսեյնը և Էնվեր փաշան:
Leave a Reply