Դաւիթ Բաբայեան. «Արցախը Թուրքիոյ համար բաց վէրք է, իսկ անոր գործած ցեղասպանութիւնները բաց վէրքեր չե՞ն»

Երբ Թուրքիոյ նախագահ Ռեճեփ Թայիփ Էրտողան կը յայտարարէ, որ Լեռնային Ղարաբաղի տագնապը ինչպէս Ազրպէյճանի, այնպէս ալ իրենց համար արիւնահոսող վէրք է, պէտք է հասկնայ, որ Թուրքիան իրաւական եւ բարոյական որեւէ հիմք չունի խառնուելու տագնապի լուծման: «Փանորամա»-ի փոխանցումով` ըսած է Արցախի նախագահի մամլոյ քարտուղար Դաւիթ Բաբայեան:

«Թուրքիան, ըլլալով ցեղասպան պետութիւն, իրաւունք չունի խօսելու բաց վէրքերու մասին: Արցախը իրեն համար բաց վէրք է, իսկ Հայոց ցեղասպանութիւնը, յոյներու, քիւրտերու, եզիտիներու, պուլկարներու եւ ասորիներու ցեղասպանութիւնները բաց վէրքեր չե՞ն: Այսպիսի մօտեցումը ֆաշականութեան, խտրականութեան գարշելի դրսեւորում է: Թուրքիան երկիր մըն է, որ չի թաքցներ իր քաղաքական յաւակնութիւնները:

«Չունենալով նման յայտարարարութիւններ ընելու ո՛չ բարոյական, ո՛չ իրաւական հիմքեր` այդ երկիրը ամէն պարագայի նման յայտարարութիւններ կ՛ընէ: Թուրքիան երբեք չէ թաքցուցած, որ ինք Ազրպէյճանի գլխաւոր հովանաւորն է: Սա երկիր մըն է, որ Ազրպէյճանին աջակցած է նաեւ ապրիլեան պատերազմի ժամանակ` այնտեղ ուղարկելով վարձկաններ: Սա երկիր մըն է, որ կը շարունակէ շրջափակման մէջ պահել Հայաստանը», նշած է Դաւիթ Բաբայեան:

Արցախի նախագահի մամլոյ քարտուղարին համաձայն, Թուրքիոյ այս տեսակի յայտարարութիւնները ցոյց կու տան, որ հայկական կողմը պէտք է զգօն ըլլայ: Անոր համոզումով, եթէ շրջանին մէջ չըլլային զսպիչ ուժեր, Թուրքիան վաղուց յարձակում կը գործէր Հայաստանի եւ Արցախի դէմ, ինչպէս որ կ՛ընէ Սուրիոյ եւ Իրաքի քիւրտերուն դէմ:

http://www.aztagdaily.com/archives/370401