Թուրքիայում Ցեղասպանության ընդունումը դարձել է ինտելեկտուալ շրջանակների ներկայացուցիչ լինելու չափանիշ. Ռագըփ Զարաքոլու

Թուրքիայի հայտնի մտավորականներից Ռագըփ Զարաքոլուն թուրքական Artigercek.com կայքի իր սյունակում կրկին խոսել է Հայոց ցեղասպանության մասին:

Ուշադրություն հրավիրելով այն փաստի վրա, որ Եվրոպական խորհրդարանի խորհրդարանական վեհաժողովն Իրաքում և Սիրիայում «Իսլամական պետություն» ահաբեկչական խմբավորման գործողությունները որակել է որպես ցեղասպանական ակտ տեղի եզդիների, քրիստոնյաների և ալևիների դեմ, Զարաքոլուն շեշտել է, որ սա 1915 թ. Հայոց ցեղասպանության յուրովի շարունակությունն է, և յուրաքանչյուրը պետք է նախ առերեսվի պատմությանը՝ նոր ցեղասպանությունները կանխելու համար:

«Ցեղասպանության ժխտումը, պատմությանն առերեսվելուց փախչելը, ներողության ու փոխհատուցման պարտքից խուսափելը մարդկայնության դեմ կատարված այս ծանր հանցանքի կրկնության մեծ վտանգ է պարունակում իր մեջ:

Ցեղասպանություն հերքող պետության որևէ քաղաքացի ապահով չէ:

Ցեղասպանության ժխտումն իրականում դրա յուրովի ընդունումն է, դա նշանակում է  «Այո, արել ենք, պետք լինի՝ նորից կանենք»:

Միջին Արևելքում այսօր տեղի ունեցող մարդկային ողբերգությունն ինչ-որ իմաստով 1915 թվականի շարունակությունն է ու այն ժամանակ կիսատ մնացածի լրացումը:

1915 թ. ողջ մնացածների ժառանգներն այսօր էլ Սիրիայում հայտնվեցին նոր ցեղասպանության վտանգի առաջ:

Չմոռանանք, որ 1915-ի ցեղասպանության իրականացման առաջին քայլերից էր դեռևս 1914 թ. նոյեմբերին ջիհադի հայտարարումը:

Սակայն շեշտենք, որ բուն խնդիրը ծագել է դեռևս 1878 թ. Բեռլինի վեհաժողովի ժամանակ: Այդ ժամանակվա համաձայնագրով հայ ժողովրդին անվտանգության ու ապահովության երաշխիք տված միջազգային խոստումն Աբդուլ Համիդի կողմից երբևէ ի կատար չածվեց:

Իբր արժանապատիվ հանրապետություն դարձած ժամանակակից Թուրքիան հեշտ ու հանգիստ ծամծմեց Լոզանի պայմանագով տրված ու երկրի փոքրամասնություններին պաշտպանության տակ առնելուն ուղղված խոստումները:

Այսօր Ստամբուլի հազարամյա տեղաբնիկներ հանդիսացող հույներն ընդամենը 2000 հոգանոց համայնք են դարձել, ասորիների համայնքի թիվն էլ նվազել է մի քանի հազարի:

Հայերը եկան այն վիճակի, որ այսօր ամբողջ Թուրքիայի տարածքում կարողանում են իրենց ազգային ինքնությամբ ապրել միայն Ստամբուլում, այն էլ՝ մշտական վախով:

Օր օրի ահագնացող հակասեմական տրամադրությունների պատճառով հրեական համայնքը նույնպես բռնում է արտագաղթի ուղին:

Մենք ծանր գին վճարեցինք, սակայն մեր հրատարակությունները, որոնք մտքի ու խոսքի ազատությանն ուղղված արգելքների դեմ մեր քաղաքացիական անհնազանդության օրինակն են, նպաստեցին, որպեսզի շատ արժանապատիվ մարդիկ ծանոթանան ճշմարտությանն ու անցնեն գործի:

Այսօր արդեն Թուրքիայում Հայոց ցեղասպանության ճանաչումն ու ընդունումը դարձել է ինտելեկտուալ շրջանակների ներկայացուցիչ լինելու չափանիշ»:

Նշենք, որ Զարաքոլուի հիմնած «Բելգե» հրատարակչությունն առաջիններից էր Թուրքիայում, որ անդրադարձել է Հայկական հարցին դեռևս 1990-ականների սկզբին: «Բելգե» հրատարակչությանն են պատկանում «Հուշամատյան ապրիլի 24-ի», «Թուրքիայի վարած ուծացման և լեզվասպանության քաղաքականությունը», «Հայոց ցեղասպանություն» և Հայկական հարցին նվիրված տասնյակ այլ գրքեր:

http://www.tert.am/am/news/2017/10/30/zarakolu/2525883