«Alikonline.ir» – Այժմեան Թուրքիայի տարածքում գտնւող Ուրֆա նահանգում՝ նահանգի վարչական կենտրոն Ուրֆա քաղաքից ոչ հեռու, թուրք հնագէտները յայտնաբերել են աւելի քան 2000 տարւայ պատմութիւն ունեցող ժայռափոր դամբարան: Տեղեկացնում է «Tert.am»-ը:
Եդեսիայի թագաւորութեան ժամանակաշրջանին պատկանած այս հսկայ դամբարանում յայտնաբերւել է ընդհանուր առմամբ 133 ժայռափոր գերեզման:
Ուրֆայի քաղաքապետ Նիհաթ Չիֆչին լրագրողների հետ զրոյցում շեշտել է, որ ժայռափոր դամբարանն ունի շուրջ 2 հազար տարւայ պատմութիւն եւ պատկանում է Եդեսիայի Աբգար թագաւորի ժամանակաշրջանին:
2-3 սենեականոց «մինի-դամբարանների» ներսի պատերի վրայ յայտնաբերւել են նաեւ հետաքրքրական մանրանկարներ:
Աւելի վաղ Ուրֆայում յայտնաբերւել էր Եդեսիայի Աբգար Ե թագաւորի ընտանեկան դամբարանը: Նշենք, որ Աբգար Ե թագաւորը յայտնի է նաեւ Աբգար Հինգերորդ Ուքքամա անւամբ:
Ըստ աւանդութեան՝ Աբգար թագաւորն ընդունել է քրիստոնէութիւն՝ դառնալով մ.թ. 1-ին դարի առաջին քրիստոնեայ թագաւորը։ Նա Հայ առաքելական եկեղեցու սրբերից է։ Ըստ Խորենացու «Հայոց պատմութեան»` եղել է հայոց թագաւոր։
Alikonline.ir
Leave a Reply