Դերսիմում Էրգանի հայկական եկեղեցին գտնվում է ոչնչացման եզրին

Այժմյան Թուրքիայի տարածքում գտնվող Դերսիմ (թուրքական պաշտոնական անվանումը` Թունջելի – Tert.am) նահանգի Հոզաթ շրջանի Էրգան գյուղում գտնվող հայկական եկեղեցին, որը հայտնի է որպես Էրգանի եկեղեցի, ամբողջական ավերման եզրին է հայտնվել:
Ինչպես փոխանցում է Yeniozgurpolitika.org կայքը, վերակառուցման կարիք ունեցող եկեղեցին պետության կողմից պահպանության տակ առնվելու որոշումից հետո նույնիսկ որևէ կերպ չի նորոգվել:
Բացի այդ՝ Էրգանի եկեղեցին պարբերաբար ենթարկվում է բնակիչների՝ քուրդ և զազա ալևի գանձագողերի հարձակումներին:
Նշվում է, որ եկեղեցին կառուցվել է 975 թ., պատերի ներսի հատվածում դեռևս պահպանվել են հայատառ որոշ արձանագրություններ:
Էրգանի եկեղեցին համարվում է Դերսիմի ամենամեծ ու հին հայկական եկեղեցիներից մեկը. պատմվում է, որ 1915 թ. ի վեր այն չի գործել. Ցեղասպանության ժամանակ եկեղեցու վերջին քահանան սպանվել է հենց այստեղ:
Էրգան գյուղը նաև հիշատակվում է Դերսիմի 1937-38 թվականների կոտորածների ժամանակ. պատմվում է, որ այստեղ սպանվել է գյուղի 200 բնակիչ, որոնց զանգվածային գերեզմանը գտնվում է հենց Էրգանում:
Հայտնի է, որ պատմական Դերսիմի տարածքում կան 132 եկեղեցիներ ու 4 վանքեր, որոնց զգալի մասն ավերակի է վերածվել:

http://www.tert.am/am/news/2017/10/30/dersim/2525396