Գերմանիայում Հայ առաքելական եկեղեցու առաջնորդարանը հայտարարությամբ է հանդես եկել վերջերս թուրքական մամուլում «Սկանդալային քարտեզ» վերնագրով հրապարակված լուրի կապակցությամբ: Առաջնորդարանը և վերջինիս մշակութային թևը նշել են, թե սույն քարտեզը ոչ մի ձևով չի արտացոլում առաջնորդարանի տեսակետը և գաղափարները:
Այդ մասին, ըստ Akunq.net-ի, հաղորդում է պոլսահայ «Ակօս» շաբաթաթերթը:
Հիշեցնենք, որ օրեր առաջ Գերմանիայի Հայ առաքելական եկեղեցու առաջնորդարանը Քյոլնի տաճարի առջև մի միջոցառում էր կազմակերպել` «Արարատի լռությունը. հայկական մշակույթն ու պատմությունը» խորագրով: Միջոցառման ընթացքում ցույց էր տրվել նաև Արևմտյան Հայաստանի քարտեզը, ինչը զայրացրել էր թուրքերին: Սոցիալական ցանցերում հրապարակված միջոցառման լուսանկարները թուրքերի վրդովմունքն էին հարուցել:
Աղբյուրի համաձայն` հայտարարության մեջ մասնավորապես ասված է.
«Սիրելի բարեկամներ, Գերմանիայի Հայ առաքելական եկեղեցու առաջնորդարանի թանկագին աջակիցներ և հյուրեր,
Սույն հայտարարությամբ ցանկանում ենք հասարակայնությանը մեր ափսոսանքը հայտնել այս տարվա` Քյոլնի հայկական մշակութային օրերի միջոցառման բացման երեկոյի վերջում տեղի ունեցած անհաճո դեպքի համար:
Բացահայտ կերպով ուզում ենք շեշտել, որ երեկոյին հանդես եկած արվեստի գործչի կողմից կողմից թատերական ներկայացման վերջում արված անձնական մեկնաբանությունները և ցույց տրված` արդի իրականությունը չարտացոլող քարտեզը ոչ մի ձևով չեն արտահայտում մեր մշակութային թևի տեսակետները և չեն համապատասխանում մեզ հետ նախապես արված փորձի բովանդակությանը: Արվեստի գործչի` արվեստի ազատության շրջանակներում ներակայացրած պահանջը և մեկնաբանություններն արտացոլում են միայն նրա անձնական գաղափարները:
Որպես Գերմանիայում Հայ առաքելական եկեղեցու առաջնորդարան և վերջինիս մշակութային թև` մեզ հեռու ենք պահում այդ տեսակետներից ու գաղափարներից և ներողություն խնդրում այդ տհաճ դեպքի համար:
Հարգանքներով` Գերմանիայում Հայ առաքելական եկեղեցու առաջնորդարանի մշակութային թևի ղեկավար Սերոբ Օդաբաշյան»:
Akunq.net
Leave a Reply