Նոր մանրամասնութիւններ համշէնահայ ընտանիքի ձերբակալութեան վերաբերեալ

ԵՐԵՒԱՆ, «Թերթ».- Համշէնահայ մտաւորական Ճեմիլ Աքսու ու կինը՝ Նուրջան Վայիչ Աքսու, կը շարունակեն բանտարկուած մնալ հասարակական ցանցերէն մէկուն վրայ Թուրքիոյ պետութիւնը քննադատած հրապարակումներու պատճառաւ:

Օրեր առաջ յայտնի դարձաւ, որ Աքսուի տան վրայ ոստիկանական գրոհ կազմակերպուած է, վաղ առաւօտեան խուզարկուած է Աքսուի եւ նոյնպէս համշէնցի գործիչ հանդիսացող անոր կնոջ բնակարանը: Նուրջան Վայիչ Աքսուն ձերբակալուած է, իսկ անոր համակարգիչն ու անձնական շարք մը գիրքեր գրաւուած են: Նախօրէին ձերբակալուած ու կալանաւորուած էր նաեւ Ճեմիլ Աքսուն:

Թրքական gazeteduvar.com.tr կայքի լրագրողներէն Պիրսեն Քայեան կը գրէ, որ համշէնահայ գործիչներու երեխան՝ փոքրիկ Արեւը, ծնողներու ձերբակալութեան ու կալանաւորման հետեւանքով մինակ մնացած է:

«Մենք յետագային ինչպէ՞ս Արեւին պիտի պատմենք այս օրերուն մասին, ի՞նչ պատասխան պիտի տանք, այսօր պետական պաշտօնեաները վաղը ինչպէ՞ս պիտի նային Արեւի աչքերուն մէջ», գրած է լրագրողը:

Ըստ Քայայի՝ Ճեմիլի ու Նուրջանի ձերբակալութեան հրամանը «շատ բարձր տեղերէ» ստացուած է:

«Ճեմիլը Խոպայի մէջ բոլորին աչքն ու ականջն է, մտաւորական է, գործիչ, գրող: Նուրջանն ալ բոլորին կողմէ ճանչցուած ու սիրուած, աշխատող, քարէն հաց քամող, նոյն ատեն քաղաքականութեան մէջ ալ դեր խաղացած կին է: Օրինակ՝ Թուրքիոյ մէջ սեռային ոտնձգութեան դէմ ամենահզօր հանրահաւաքներէն մէկը կազմակերպած խոպացի կանանց շարքին էր ան», կը գրէ Քայեան:

Նշենք, որ Ճեմիլ Աքսու ժամանակին բանտարկուած է իր քաղաքական հայեացքներուն պատճառով, շուրջ 9 տարի:

Asbarez.com