Ինչո՞ւ Դուք չեք ճանաչում Հայոց ցեղասպանությունը. Ազնավուրի հարցը՝ Իսրայելի նախագահին

Իսրայելի նախագահի նստավայրում նախօրիեն կայացել է աշխարհահռչակ  ֆրանսահայ շանսոնյե Շառլ Ազնավուրի և նրա քրոջը՝  Աիդա Ազնավուրի պարգևատրման արարողությունը: Ռաուլ Վոլլենբերգի անվան միջազգային կազմակերպության (IRWF) որոշմամբ` Ազնավուրները պարգևատրվել են  շվեդ դիվանագետ Ռաուլ Վալենբերգի անվան մեդալով: Նրանք այդ հեղինակավոր մրցանակին արժանանում են մարդասիրական գործունեության  համար: Փարիզում նացիստական օկուպացիայի դժվարին շրջանում Ազնավուրների ընտանիքը՝ մայրը՝ Քնարը, հայրը՝ Միշան, ինչպես նաև` հենց իրենք օգնել են ֆաշիստների կողմից հետապնդվող մարդկանց:

Աիդա Ազնավուրը ներկա չի եղել արարողությանը, նրա պարգևը վերցրել է Շառլ Ազնավուրի որդին՝ Նիկոլասը:

Dailymail-ի հաղորդմամբ` Ազնավուրն իր պարգևը ստացել է Իսրայելի նախագահ Ռոուվեն Ռիվլինից, ով ասել է, որ շատ է սիրում Ազնավուրի երաժշտությունը. «Լա Բոհեմ»-ն իր ամենասիրելի երգն է:
Նա նաև նշել է, որ Ազնավուրների ընտանիքը  Երկրորդ համաշխարհային պատերազմի տարիներին թաքցրել է նացիստների կողմից հետապնդվող  մի շարք մարդկանց, իսկ Շառլն ու նրա քույրը՝ Աիդան, մասնակցել են փրկարարական աշխատանքներին:

«Ազատության» հաղորդմամբ` Ազնավուրն իր խորին երախտագիտությունն է հայտնել թե՛ Վալենբերգի անվան հիմնադրամին՝ պարգևի համար, թե՛ Իսրայելի նախագահին՝ ընդունելության համար:

Աշխարհահռչակ շանսոնիեն նաև հարցրել է, թե ե՞րբ է ի վերջո Իսրայելը ճանաչելու Հայոց ցեղասպանությունը:

«Ես ոչ գաղտնի հարց եմ Ձեզ ուղղում և չեմ սպասում պատասխանի, այնուամենայնիվ կարևոր է այն բարձրացնել: Ինչո՞ւ Դուք չեք ճանաչում Հայոց ցեղասպանությունն այն դեպքում, երբ ինքներդ եք տառապել նացիստական ռեժիմից», – հարցրել է Ազնավուրը:

Ի պատասխան՝ Ռիվլինն ասել է, որ դա քաղաքական հարց է, և իր՝ Քնեսեթի պատգամավոր ու այնուհետև նաև նախագահ աշխատած ժամանակաշրջանում յուրաքանչյուր տարի այս հարցը Իսրայելի խորհրդարանում բարձրացրել են, հիշատակել են Հայոց ցեղասպանության օրը, և ինքն էլ 2015 թ. ՄԱԿ-ի ամբիոնից բավական հստակ խոսել է 1915 թ. տեղի ունեցած Հայոց ցեղասպանության մասին:

«Մենք Քնեսեթում ներկա ենք եղել այդ սարսափելի իրադարձությունների հիշատակի արարողությանը: Ցավոք, Իսրայելի կառավարությունը չկարողացավ տեղի ունեցածը ճանաչել որպես Ցեղասպանություն, և միակ հարցն այն է, թե ինչպես է այն ձևակերպվում: Եվ ես, որպես Իսրայելի նախագահ, պարտավոր եմ հարգել Իսրայելի կառավարության որոշումները: Կոտորած, թե ցեղասպանություն՝ սարսափելի, սարսափելի բան է տեղի ունեցել Հայ ժողովրդի հետ 1915 թվականին», – մասնավորապես ասել է Իսրայելի նախագահը:

https://www.panorama.am/am/news/2017/10/27/%D5%87-%D4%B1%D5%A6%D5%B6%D5%A1%D5%BE%D5%B8%D6%82%D6%80/1856426