Թուրքիայի իշխանությունները Գարեգին Բեկչյանին չե՞ն ուզում տեսնել պատրիարքի պաշտոնում. «Ակօսի» անդրադարձը

Ստամբուլի հայկական պարբերականներից «Ակօսը» մեկնաբանել է նախօրեին Ստամբուլի նահանգապետարանում Պոլսո Հայոց պատրիարքի ընտրությունների շուրջ կայացած հանդիպումը, որին մասնակցել էին Ստամբուլի նահանգապետ Վասիփ Շահինը, Պոլսո Հայոց պատրիարքարանի Եկեղեցական խորհրդի նախագահ Սահակ Մաշալյանը, Ստամբուլի հայկական Սուրբ Փրկիչ հիվանդանոցի ղեկավար Պետրոս Շիրինօղլուն, Պոլսո Հայոց պատրիարքի ընտրության կազմակերպմամբ զբաղվող նախաձեռնող խմբի նախագահ Սարգիս Քյուլեգեչը և Պոլսո պատրիարքի նախկին փոխանորդ Արամ Աթեշյանը:

«Ակօսը» հանդիպումն անվանել է տարօրինակ և ուշադրություն հրավիրել այն փաստի վրա, որ այն անցկացվել է Պոլսո Հայոց պատրիարքի տեղապահ Գարեգին Բեկչյանի՝ Գերմանիայում գտնվելու ընթացքում:

Ավելի վաղ հայտնի էր դարձել, որ նահանգապետը հանդիպման ընթացքում հայտնել է, որ հետևում է գործընթացին և հետաքրքրվում զարգացող իրադարձություններով, վերջինս նաև խնդրել է փոխանցել հայ համայնքի անդամներին, որ ընտրությունների կազմակերպման հետ կապված անհանգստանալու կարիք չկա:

«Ակօսը» հիշեցնում է, որ այս հանդիպումը կազմակերպվել է այն բանից հետո, երբ մամուլում լուրեր տարածվեցին, թե պետությունը չի ցանկանում Բեկչյանին տեսնել ապագա պատրիարքի պաշտոնում:

Պարբերականը վրդովվեցուցիչ է համարում այն հանգամանքը, որ պետությունը շարունակում է միջամտել իրենց ներհամայնական կյանքին, ու շեշտում, որ Բեկչյանի ընտրությունը չի հակասում օրենքին, քանի որ վերջինս թեև Թուրքիայում չի ապրում, սակայն ծնվել է այստեղ: Ավելին՝ Պոլսո Հայոց պատրիարք դառնալու համար բավական է միայն այն, որ հոգևորականի ծնողները կամ միայն հայրը ծնված լինի Թուրքիայում կամ Օսմանյան կայսրությունում:

http://www.tert.am/am/news/2017/10/26/bekchyan/2523013