Թուրքիայում ձերբակալվել է հայ և բոլոր փոքրամասնությունների պաշտպան Օսման Քավալան

Ստամբուլի օդակայանում ժամեր առաջ ձերբակալվել է թուրք գործարար, հայ և բոլոր փոքրամասնությունների պաշտպան Օսման Քավալան։ Թուրքիայում «Անադոլու Քյուլթյուր» հասարակական կազմակերպության հիմնադիր նախագահ, առաջադիմական «Իլեթիշիմ» հրատարակչության սեփականատեր Քավալան 2010-ից սկսած եղել է ամեն տարի ապրիլի 24-ին կազմակերպվող` Հայոց ցեղասպանության նահատակների ոգեկոչման ձեռնարկների հիմնական կազմակերպիչը։

Հորից ժառանգած հսկա «Քավալա հոլդինգի» տեր Օսման Քավալան իր աջակցությունն էր բերել  գերմանական «Գյոթե ինստիտուտի» մի խորհրդաժողովի ու այդ նպատակով մեկնել էր Այնթափ, որտեղից վերադառնալիս Ստամբուլի Աթաթուրքի անվան օդակայանում ոստիկաններն, անգամ չսպասելով, որպեսզի վերջինս մտնի սպասասրահ, ներխուժել են օդանավ ու ուղեկցել նրան ոստիկանության գլխավոր շտաբ։

Օսման Քավալան վերջերս երկու անգամ Հայաստան էր այցելել։  Նա Թուրքիայի Բուրսա քաղաքի և Նիլյուֆեր շրջանի քաղաքապետական թատրոնի` Հայաստան կատարած հյուրախաղերի ֆինանսական ծախսերը հոգալու պատասխանատվությունն էր ստանձնել։ Նշենք, որ այս թատերախումբը, ի հարգանս «Թուրքիայում արևմտյան ոճով թատրոնի հիմնադիր հայերի», թուրքերենի էր թարգմանել տվել (Պողոս Չալկըջյանին) ու բեմադրել Հակոբ Պարոնյանի «Ատամնաբույժն արևելյան» պիեսը. Թուրքիայում այն ներայացնելուց հետո ցանկություն կար պիեսը ներկայացնել նաև Հայաստանում։

Թեև Գյումրիում ու Երևանում երկու անգամ ներկայացման բեմադրման վայրը փոխվեց, ու Հակոբ Պարոնյանի անվան երաժշտական կոմեդիայի թատրոնի փոխարեն դռները բացեց Հրաչյա Ղափլանյանի անվան դրամատիկական թատրոնը, ձեռնարկն իրականություն դարձավ, ու հայ հանդիսատեսն ականատես եղավ բարձրաճաշակ բեմադրության։

Օսման Քավալան երկրորդ անգամ իմ առաջարկով ու նախաձեռնությամբ էր եկել Երևան` նոր մշակութային ձեռնարկի համար։

Րաֆֆի–Հերմոն Արաքս

Orer.eu