ԱՄՆ-ն մերժել է վիզային ճգնաժամի կարգավորման համար թուրքական կողմի` հանձնաժողով ստեղծելու առաջարկը. լրատվամիջոցներ

Միացյալ նահանգները մերժել է թուրք-ամերիկյան վիզային ճգնաժամի կարգավորման համար ընդհանուր հանձնաժողով ստեղծելու թուրքական կողմի առաջարկը, այս մասին գրում է թուրքական «Ջումհուրիյեթ» պարբերականի թղթակիցներից Դույգու Գյուվենչը:

Գյուվենչը նշել է, որ մոտ օրերս Թուրքիա ժամանել պատրաստվող ամերիկյան պատվիրակությունն Անկարայում քննարկելու է ոչ թե թուրք-ամերիկյան դիվանագիտական ճգնաժամի հարցը, ինչպես դա ներկայացնում են թուրքական մի շարք լրատվամիջոցներ, այլ իրականում խոսելու է սիրիական հիմնախնդրի շուրջ:

ԱՄՆ պետքարտուղարի օգնականի տեղակալ Ջոնաթան Քոհենի գլխավորած պատվիրակությունը պետք է Անկարա ժամանի այս շաբաթ: Ընդ որում՝ հայտնի է, որ ամերիկյան կողմը մերժել է վիզային ճգնաժամի շուրջ բանակցելու առաջարկը: ԱՄՆ-ն նաև չի արձագանքել հարցի շուրջ ընդհանուր հանձնաժողով ստեղծելու մասին Թուրքիայի առաջարկին:

Հիշեցնենք, որ օրեր առաջ ԱՄՆ դիվանագիտական առաքելության աշխատակիցը ձերբակալվել էր Ստամբուլում՝ անցյալ տարի տապալված հեղաշրջման համար մեղադրվող ընդդիմադիր իսլամիստ քարոզիչ Ֆեթուլլահ Գյուլենի կազմակերպության հետ կապերի մեղադրանքով: Դրանից հետո Թուրքիայում ԱՄՆ դեսպանատունը հայտնել էր Թուրքիայի քաղաքացիներին վիզաների տրամադրման դադարեցման մասին: Թուրքիան նույնպես դադարեցրել էր ԱՄՆ քաղաքացիների համար մուտքի վիզաների տրամադրումը:

http://www.tert.am/am/news/2017/10/16/usa-turkey/2512339