ԱՄՆ-ի միջազգային կրոնական ազատության հարցերի հանձնաժողովի փոխնախագահներն այցելել են Պոլսո Հայոց պատրիարքարան

Օրերս Պոլսո Հայոց պատրիարքարան են այցելել ԱՄՆ–ի միջազգային կրոնական ազատության հարցերի հանձնաժողովի (USCIRF) փոխնախագահներ Քրիստինա Արիակա դը Պուքհոլսն ու Սանդրա Ժոլին, գրում է Ստամբուլի հայկական պարբերականներից «Ժամանակը»:

Նրանք հանդիպում են ունեցել Պոլսո Հայոց պատրիարքարանի տեղապահ Գարեգին արքեպիսկոպոս Բեկչյանի հետ:

Արքեպիսկոպոս Բեկչյանին այցելած պատվիրակությունը հետաքրքրվել է Պոլսո Հայոց պատրիարքի ընտրությունների նախապատրաստական գործընթացից: Գարեգին Բեկչյանն ընդգծել է, որ Թուրքիայի Հանրապետության հռչակումից հետո պոլսահայ համայնքն իրականացրել է իր ընտրությունները Հայ առաքելական եկեղեցու ավանդույթների համաձայն, և այժմ իրենք նույնն են ակնկալում:

Տեղապահ Բեկչյանը հավելել է, որ այժմ իրենք սպասում են Ստամբուլի նահանգապետարանի համաձայնությանը և համապատասխան գրավոր ընթացակարգին: Համայնքում հուսով են, որ պետության կողմից կազմված ընթացակարգը չի խախտի բազմադարյա ավանդույթն ու նոր նախընտրական խնդիրներ չի ստեղծի:

http://www.tert.am/am/news/2017/10/04/istanbul-armenians/2501735