Թուրքիան այլևս ԵՄ անդամակցության կարիքը չունի. Էրդողան

Թուրքիան այլևս Եվրամիությանն անդամակցելու կարիք չունի, սակայն մտադիր չէ միակողմանի կարգով դուրս գալ համապատասխան բանակցություններից:

DW.com-ի փոխանցմամբ՝ նման հայտարարությամբ հոկտեմբերի մեկին հանդես է եկել Թուրքիայի նախագահ Ռեջեփ Թայիփ Էրդողանը: «Մենք չենք լինի այն երկիրը, որը հանձնվում է: Ճիշտն ասած, մենք Եվրամիության անդամակցության կարիքն այլևս չունենք», – ասել է թուրք ղեկավարը:

Էրդողանը կարծիք է հայտնել, որ Եվրամիությունը «չի արդարացրել Անկարայի հույսերը» ահաբեկչության դեմ պայքարում, և ակնարկել է, որ ԵՄ-ն նախկինի պես Թուրքիայի կարիքն ունի:

«Եթե Եվրամիությունը ցանկանում է առաջ շարժվել, ապա դրա համար միայն մեկ ճանապարհ կա, այն է` անդամակցություն տալ Թուրքիային և գործողություններ սկսել՝ ուղղված մշակութային և տնտեսական աճին», – հավելել է Էրդողանը:

ԵՄ-Թուրքիայի բանակցություններն անդամակցության մասին սկսվել են 2005-ին՝ Անկարայի կողմից համապատասխան հայտ ներկայացնելուց 18 տարի անց:

http://www.tert.am/am/news/2017/10/01/turkey/2498983