Թուրքիայի ընդդիմադիր Ժողովրդադեմոկրատական կուսակցության կրոնական հարցերով խորհրդի հայազգի անդամ Մուրադ Մըհչըն հայտարարել է, որ տարբեր ռասիստական հարձակումների հետևանքով Թուրքիայի հայկական դպրոցների աշակերտների թիվը նվազել է, գրում է թուրքական yeniozgurpolitika.org կայքը:
Բացի այդ, Մըհչըն լրագրողների հետ զրույցում շեշտել է, որ «Պատմություն» և «Սոցիոլոգիա» առարկաների ուսուցիչներին հայկական վարժարանների համար ընտրում է Թուրքիայի կրթության նախարարությունը, ինչն ըստ Մըհչըի՝ բացասական երևույթ է:
Նա նաև նշել է, որ նախորդ տարվա համեմատ այս տարի Թուրքիայի հայկական դպրոցներում աշակերտների թիվը նվազել է 10 տոկոսով:
«Մարդիկ այս երկրում շարունակում են ապրել «աղավնու վախով»: Թուրքիայի հայերը կարծում են, որ եթե իրենց երեխաները հայերեն խոսեն՝ խտրականության կբախվեն: Այդ իսկ պատճառով նրանք հաճախ երեխաներին ուղարկում են Եվրոպա», – ասել է Մըհչըն:
Հայազգի քաղաքական գործիչը նաև հավելել է, որ վերջին քաղաքական լարված իրավիճակի պատճառով Ստամբուլի հայ համայնքի ներսում ինտենսիվացել է արտագաղթը դեպի Եվրոպա և Հայաստան:
Նշենք, որ Ստամբուլում գործում է 16 հայկական վարժարան: Այս դպրոցներում կարող են սովորել միայն հայ քրիստոնյա ընտանիքի զավակները` ներկայացնելով մկրտության թուղթ: Սա կապված է նրա հետ, որ Թուրքիայի Հանրապետության օրենսդրության համաձայն՝ երկրի բոլոր քաղաքացիները պաշտոնապես թուրք են համարվում, իսկ հայերը, հույները և հրեաները համարվում են կրոնական փոքրամասնություն: Ըստ Լոզանի պայմանագրի` կրոնական փոքրամասնություն համարվելու շնորհիվ հայերն իրավունք են ստացել սովորելու իրենց մայրենին, ինչից զրկված են քրդերը, զազաները, չերքեզներն ու լազերը:
Թուրքիայի հայկական վարժարանների մեծ մասը գոյատևում է համայնքի տարբեր բարերարների նվիրատվությունների հաշվին, դրա հետ զուգահեռ՝ դպրոցներ հաճախող հայ աշակերտների թիվն ամեն տարի նվազում է: Դա կապված է թե՛ Կ.Պոլսի հայ համայնքի արտագաղթի, թե՛ վարժարանների ուսման բարձր վարձավճարների հետ (Ստամբուլի հայկական վարժարանների ուսման վարձերը կազմում են տարեկան միջինը 3000 դոլար):
http://www.tert.am/am/news/2017/09/29/murad-mihci/2497755
Leave a Reply