Թուրքիան ինքն իրենով մի մեծ հայկական գերեզման է. «Ակօսի» գլխավոր խմբագիրը՝ թուրք ազգայնականներին

Ստամբուլի հայկական պարբերականներից «Ակօսի» գլխավոր խմբագիր Եդվարդ Տանձիկյանը թուրքական artigercek.com կայքի իր սյունակում անդրադարձել է օրերս Թուրքիայում մեծ աղմուկ բարձրացրած՝ ընդդիմադիր Ժողովրդադեմոկրատական կուսակցության կալանավորված պատգամավոր Այսել Թուղլուքի մոր հուղարկավորության արարողության ժամանակ ազգայնական խմբավորումների հարձակմանը:

Հիշեցնենք, որ քուրդ զինյալների հետ կապերի համար մեղադրվող պատգամավորի մոր դին հանել էին գերեզմանափոսից ու բացականչել. «Այստեղ նահատակներ են թաղված, սա ահաբեկիչների տեղը չէ, սա հայկական գերեզմանատուն չէ»:

Տանձիկյանը «Հայկական գերեզմանատուն չէ, այնպես չէ՞» վերնագրով իր հոդվածում խորհուրդ է տվել ազգայնականներին կարդալ վերջերս Ստամբուլում հրատարակված Անկարայի հայ կաթոլիկների բռնագաղթի ու կոտորածների մասին պատմող նոր գիրքը և մեջբերումներ արել ցեղասպանության մասին սարսափելի արխիվային վկայություններից: Պոլսահայ մտավորականը գրել է, որ Թուրքիայի գրեթե ամեն անկյունը գերեզման է դարձել հայերի համար:

«Պատկերացրեք մի ժողովուրդ, որն իր իսկ հողերում արմատախիլ արվել, գաղթեցվել է ու այժմ էլ ստիպված է ամեն Աստծո օր ապացուցել այն, ինչ եկել է գլխին: Այս ամենը պետական քաղաքականության հետևանք է: Պետության կողմից կանաչ լույսի ազդանշանը ստանալուն պես այս ազգայնական խմբերը սովորաբար իրենց դիմացիններին ճզմելու համար հաճախ օգտագործում են նաև հակահայկականությունը: Ինչո՞ւ: Որովհետև միջավայրն է դա թույլ տալիս: Ինչո՞ւ: Որովհետև անգամ հեղաշրջման փորձի համար հայերին մեղադրող քաղաքական գործիչներ ունենք: Ինչո՞ւ: Որովհետև քրդական հիմնախնդրում անգամ «Թուրքերն ու քրդերն իրականում լավ էլ հասկանում են իրար, հայերն են խառնում ամեն բան» ասողներ կան: «Այստեղ հայկական գերեզմանատուն չէ» բացականչության պատասխանն այս օրերին սոցցանցերում բազմիցս տրվեց. այս երկիրն ինքն իրենով մի մեծ հայկական գերեզման է», – գրել է «Ակօսի» գլխավոր խմբագիրը:

Հիշեցնենք, որ Թուրքիայի կառավարության խոսնակ Բեքիր Բոզդաղը դատապարտել էր ազգայնական խմբերի վարքն ու հայտարարել, որ նրանց արարքը հակասում է իսլամի արժեքներին: Թուրք պաշտոնյան խոստացել էր, որ մեղավորներն անպայման կկրեն իրենց պատիժը, և տեղեկացրել, որ դեպքի հետաքննությունն արդեն ընթացքի մեջ է: Դեպքի առթիվ կալանավորվել է 3 մարդ:

http://www.tert.am/am/news/2017/09/19/yetvart-dandzikyan/2487557