Թուրքիայի զինված ուժերի ստորաբաժանումները սեպտեմբերի 18-ին սկսել են զորավարժություն անցկացնել Իրաքի սահմանին՝ Սիլոպի–Խաբուր սահմանային շրջանում: Մասնավորապես Խաբուրի սահմանային կետն անցում է ապահովում Թուրքիայի հարավ–արևելյան Շըրնաք նահանգի և հյուսիսային Իրաքի քրդական ինքնավարության Զահո քաղաքի միջև:
Այս մասին հայտնել է թուրքական բանակի գլխավոր շտաբը՝ նշելով նաև, որ զորավարժությանը զուգահեռ վերոնշյալ սահմանային գոտիներում շարունակվում են հակաահաբեկչական օպերացիաները:
«Hurriyet» պարբերականը հիշեցնում է, որ իրաքյան Քուրդիստանում նախատեսվող անկախության հանրաքվեն խիստ քննադատության է ենթարկվել պաշտոնական Անկարայի կողմից: Նախագահ Էրդողանը անընդունելի է համարել Իրաքի տարածքային ամբողջականությունը խաթարող ցանկացած գործողություն:
«Այն խորապես անհանգստացնում է մեզ՝ գտնվելով մեզանից 350 կմ հեռավորության վրա»,- ասել է Էրդողանը:
Վերլուծական շրջանակները հակված են կարծելու, որ հիշյալ զորավարժությունն անցկացվում է որպես ուղերձ՝ հղված քրդական ինքնավարության ղեկավար Մասուդ Բարզանիին: Վերջինս համառորեն պնդում է, որ անկախության հանրաքվեի անցկացումն անհրաժեշտություն է:
Leave a Reply