Հերթական սկանդալը. Աթեշյանը Էրդողանին կրկին շնորհակալություն է հայտնել Ցեղասպանության մասին լպիրշ ուղերձի համար

Պոլսո Հայոց պատրիարքի փոխանորդ Արամ Աթեշյանը շնորհակալություն է հայտնել նախագահ Ռեջեփ Թայիփ Էրդողանին՝ ապրիլի 24-ին հղած ուղերձի համար:

Պոլսում լույս տեսնող «Ժամանակ» թերթի հաղորդմամբ՝ Աթեշյանն իր շնորհակալությունը հայտնելու համար հայտարարություն է տարածել, որում Թուրքիայի հայ համայնքի անունից հերթական անգամ իր դրական արձագանքն է հայտնել նախագահի ուղերձին:

Նշենք, որ Աթեշյանը նախորդ տարի նույնպես շնորհակալություն էր հայտնել Էրդողանին՝ Ցեղասպանության 101-րդ տարելիցի կապակցությամբ ուղերձի համար, ինչը Թուրքիայի հայ համայնքի կողմից բացասական էր ընդունվել: Նրանք իրենց բողոքն էին արտահայտել` նշելով, որ Աթեշյանն իրավունք չունի ամբողջ համայնքի անունից շնորհակալություն հայտնելու: Աթեշյանին քննադատել էր նաև «Ակօս»-ը:

Աթեշյանն իր հայտարարության մեջ մասնավորապես նշել է, որ «Էրդողանն արդեն երրորդ անգամ ուղերձ է հղում ապրիլի 24-ի առիթով՝ կիսելով թուրքահայության ցավը»: Պատրիարքի փոխանորդը նաև նշել է, թե իբր «հայ համայնքի անդորրության, անվտանգության ու երջանկության նկատմամբ Էրդողանի ցուցաբերած մասնավոր կարևորությունը դրական արձագանք է գտել և մեծ գոհունակության արժանացել համայնքի կողմից»:

Աթեշյանի խոսքով՝ «անգնահատելի նշանակություն» ունի Էրդողանի ուղերձում արտահայտված՝ միության և միասնականության միջավայրում ղեկավարելու հասկացությունը: Նա անդրադարձել է նաև Էրդողանի խոսքերին՝ «հայկական մշակութային ժառանգության պահպանման ուղղությամբ պետության կողմից արվելիք քայլերին»:

Աթեշյանը չի մոռացել նաև երախտագիտություն հայտնել Էրդողանին: «Ես միշտ աղոթում եմ մեր պետության անսասանության համար»,- նշել է նա:

http://www.yerkir.am/news/view/128308.html