Թուրքիայում սպանված հայ զինվորի ընտանիքը բողոքարկում է իրենց տրամադրվող փոխհատուցման չափը

Թուրքիայի բանակում հայ զինվոր Սևակ Բալըքչըի սպանության գործով թուրքական դատարանը փոխհատուցման մասին որոշում է կայացրել:

Ստամբուլի հայկական «Ակoս» պարբերականը հայտնում է, որ դատարանը վճռել է Բալըքչը ընտանիքին վճարել 40 հազար թուրքական լիրա (շուրջ 11 հազար ԱՄՆ դոլար) փոխհատուցում:

Բալըքչը ընտանիքի փաստաբան Իսմայիլ Ջեմ Հալավուրթը հայտնել է, որ դատարանի վճռով սահմանված փոխհատուցման գումարը նմանօրինակ դատական գործերում վճարվող գումարից չափազանց ցածր է: Նա հայտնել է, որ դատարանի որոշումը բողոքարկել է վճռաբեկ դատարանում:

Սևակ Բալըքչըի սպանության քրեական գործի դատավարությունը դեռ շարունակվում է: Սևակ Շահին Բալըքչըն թուրքական բանակում սպանվել էր 2011 թ. ապրիլի 24-­ին, երբ նրա զորացրմանը մնացել էր ընդամենը 23 օր: Զորամասի հրամանատարությունը սպանությունից անմիջապես հետո հայտարարել էր, որ այն տեղի է ունեցել «ծառայակից ընկերոջ հետ կատակելու ժամանակ` պատահաբար արձակված գնդակից»:

Սևակի ծնողները, սակայն, պնդում են, որ նրան սպանել են հայ լինելու համար:
Դիարբեքիրի ռազմաօդային ուժերի ռազմական դատարանը 2013 թ. մարտի 26-­ին որոշում էր կայացրել, համաձայն որի` Սևակի վրա կրակած Քըվանչ Աղաօղլուն «կանխամտածված սպանության» մեղադրանքով դատապարտվել էր 4 տարի 5 ամիս 10 օր ազատազրկման, իսկ ենթասպա Սեդրեթթին Էրսյոզը, «պաշտոնը չարաշահելու» հիմնավորմամբ, դատապարտվել էր 5 ամիս ազատազրկման: Որոշման հրապարակումից հետո պատասխանող կողմի իրավաբանները դիմել էին վերաքննիչ դատարան` վիճարկելով կայացրած որոշումը:

Ռազմական գլխավոր դատախազությունը 2014 թ. վճիռ էր արձակել այն մասին, որ սպանության կատարման մեջ դիտավորություն չի արձանագրվել. անբավարար են փաստերը, որոնք ապացուցում են սպանության դիտավորությունը: Ուստի դատախազությունը չեղյալ էր համարել Դիարբեքիրի դատարանի որոշումը:

Դատարան վերադարձած դատական գործն սկսել էր վերանայվել սկզբից: 2016 թ. հուլիսի 15-ի ռազմական հեղաշրջման փորձից հետո ընդունվել էր նոր հրամանագիր ռազմական դատարանների վերացման մասին, ուստի 2017 թ. փետրվարի 2­-ին Սևակ Բալըքչըի դատական գործը փոխանցվել է Քոզլուքի քրեական դատարան:

https://168.am/2017/04/21/784622.html