Էրդողանը հանրաքվեի արդյունքների հրապարակումից հետո սուլթանների դամբարան է այցելել

Թուրքիայի նախագահ Ռեջեփ Թայիփ Էրդողանը հանրաքվեի արդյունքների հրապարակումից հետո ապրիլի 17-ին մի շարք այցեր է կատարել Ստամբուլում։   

Թուրքական իշխանամետ «Sabah» թերթը տեղեկացնում է, որ Էրդողանն այցելել է գերեզմանատուն՝ հարգանքի տուրք մատուցելու նախկին նախագահ Թուրգութ Օզալին, վարչապետներ Ադնան Մենդերեսին և Նեջմեթթին Էրբաքանին։ Այնուհետև նախագահն այցելել է Էյուփ Սուլթանի մզկիթ, ապա Ֆաթիհ մզկիթ, որտեղ գտնվում է Կոստանդնուպոլիսը գրաված սուլթան Մեհմեթ 2-րդ Ֆաթիհի (Նվաճող) դամբարանը։ Մեհմեթ 2-րդի գերեզմանի վրա Ղուրան կարդալուց հետո Էրդողանն ուղևորվել է մեկ այլ սուլթանի՝ Սելիմ 1-ին Ահեղի դամբարան։

Էրդողանին ուղեկցել են մեջլիսի նախագահ Իսմայիլ Քահրամանը, էներգետիկայի և բնական պաշարների նախարար Բերաթ Ալբայրաքը, նախագահի խոսնակ Իբրահիմ Քալընը։

Ermenihaber.am