Վրացահայերը դիմել են նախագահին. Խորհրդարանում քննարկել Հայոց ցեղասպանությունը ճանաչելու հարցը

Վրաստանում գործող հայկական պետական եւ հասարակական կազմակերպությունները դիմել են երկրի խորհրդարանին, նախագահին եւ վարչապետին` պահանջով, որպեսզի Վրաստանում սկսվի 1915-1923 թթ. հայ ժողովրդի Ցեղասպանության փաստի ճանաչման պաշտոնական քննարկումը:

Վրաստանի հայ համայնքի մամուլի դիվանից հայտնում են, որ հայտարարության մեջ ասված է.

«1915-1923թթ. կատարված հանցագործության հետևանքով հայ ժողովուրդը կորցրեց ավելի քան 2 000 000 իր որդիներին ու դուստրերին, իսկ Հայաստանի մեծ մասը գրավվեց հայ ժողովրդի կոտորածն իրականացրած թուրքական պետության կողմից: 1915-23թթ. Թուրքիայի կողմից կատարված հանցագործությունը գնահատվում է որպես Ցեղասպանություն` հանցագործություն մարդկայնության դեմ:

Դեռեւս 1915թ. մայիսին Մեծ Բրիտանիան, Ֆրանսիան եւ Ռուսաստանը համատեղ հայտարարությամբ ներկայացան, որի տակ ստորագրած ուժերը Թուրքիայի հանցագործ գործողությունները բնութագրում են որպես «նոր հանցագործություն մարդկայնության եւ քաղաքակրթության դեմ»: Հայ ժողովրդի ոտնահարված իրավունքների վերականգնման` հատուցման հարցը քննարկվել է նաեւ 1919թ. Փարիզի հաշտության կոնֆերանսի ժամանակ, որի աշխատանքների շրջանակներում ստեղծվել է խաղաղ հայ բնակչության դեմ Թուրքիայի կողմից իրականացված հանցագործությունը հետաքննող դատական ատյան:

Արեւմտյան Հայաստանի տարածքների ապաբռնագրավման հարցն արտացոլված է եղել 1920թ. Սեւրի պայմանագրի դրույթներում` դառնալով Փարիզի հաշտության կոնֆերանսի արդյունքների մի մասը: 1915-23թթ. Հայոց ցեղասպանության փաստը հիմք դարձավ հրեական ծագումով լեհ փաստաբան Ռաֆայել Լեմկինի` 1943թ. մշակած եւ 1948թ. ՄԱԿ-ի Գերագույն Ասամբլեայի ընդունած բանաձեւի համար, ըստ որի` ընդունվեց «Ցեղասպանության հանցագործությունը կանխարգելու եւ պատժելու մասին կոնվենցիան»: Հարկ է նշել, որ 1993թ. հոկտեմբերին 11-ին Վրաստանը վավերացրեց այդ կոնվենցիան:

Այսօր 1915-23թթ. Հայոց ցեղասպանության փաստը ճանաչվել է, իսկ նրա կազմակերպիչ Թուրքիան դատապարտվել է ավելի քան 20 երկրների կողմից (Կանադա, Իտալիա, Ֆրանսիա, Շվեյցարիա, Արգենտինա, Լիբանան, Նիդեռլանդներ, Ռուսաստան, Լեհաստան, Վատիկան եւ այլն): Հայ ժողովրդի հանդեպ Ցեղասպանության իրականացման փաստը ճանաչել է նաեւ ԱՄՆ-ի 50 նահանգներից 47-ը, ինչպես նաեւ միջազգային կազմակերպությունների մի ամբողջ շարք, այդ թվում` Եվրոպական Խորհրդարանը, Եվրախորհուրդը, Եվրոպական Ժողովրդական Կուսակցությունը եւ այլն:

Մենք՝ Վրաստանում գործող հայկական պետական եւ հասարակական ներքոստորագրյալ կազմակերպություններս, հանուն արդարության եւ ժողովրդավարական արժեքների, կոչ ենք անում ձեզ` միանալ համաշխարհային քաղաքակիրթ հանրությանը, հարգել Վրաստանի Հանրապետության քաղաքացիների կամքը եւ Վրաստանի խորհրդարանում նախաձեռնել Օսմանյան կայսրության տարածքում հայ ժողովրդի Ցեղասպանության փաստի ճանաչաման հարցի քննարկումը»:

Հիշեցնեք, որ Վրաստանում գործող հայկական կազմակերպություններն արդեն 12-րդ անգամ են դիմում երկրի իշխանությանը 1915-23թթ. Ցեղասպանության փաստի` Վրաստանի կողմից պաշտոնական ճանաչման խնդրանքով: Մինչդեռ, չնայած բազում դիմումներին, Վրաստանի իշխանությունն ամեն կերպ անտեսում է երկրի բնակչության ընդհանուր քանակի ավելի քան 6% կազմող իր քաղաքացիների կամքը:

1915-23թթ. Ցեղասպանության փաստի ճանաչման հարցի քննարկումները Վրաստանում սկսելու կոչով խորհրդարանին ուղղված դիմումը ստորագրել են Վրաստանի հայ համայնքը, Վիրահայոց թեմի «Հայարտուն» մշակութալուսավորչական կենտրոնը, Պ. Ադամյանի անվամբ Թբիլիսիի պետական Հայկական դրամատիկական թատրոնը, «Վրաստան» թերթը՝ Վիրահայերի միություն, «Խաղախության հիմնադրամը», Սամվել Պետրոսյանը, Սամցխե-Ջավախքի եւ Քվեմո Քարթլիի հայկական հասարակական կազմակերպությունների խորհուրդը, Ախալցխայի երիտասարդական կենտրոնը եւ այլ:

https://news.am/arm/news/384609.html