Թուրքիայում 2016–ի հուլիսի 15–ի հեղաշրջման փորձի կազմակերպման մեջ մեղադրվող գլխավոր կասկածյալներից գեներալ Էրհան Ջահայի տնից հայտնաբերվել է «Օսմանյան կասրությունից մինչեւ հանրապետություն ծպտյալ հրեաներն ու Բագրատունիները» գիրքը։
Թուրքական Anadolu գործակալության փոխանցմամբ՝ 2016–ի հուլիսի 15–ի հեղաշրջման փորձի գործի շրջանակներում ցամաքային ուժերի հրամանատարությունում տեղի ունեցած դեպքերի գործով 150 զինվորականների դեմ պատրաստված մեղադրական զեկույցը ներկայացվել է դատարան։
Մեղադրական զեկույցում գլխավոր կասկածյալ գեներալ Էրհան Ջահայի տնից հայտնաբերվել է Ահմեդ Աքգյունի հրատարակած «Օսմանյան կասրությունից մինչեւ հանրապետություն ծպտյալ հրեաներն ու Բագրատունիները» գիրքը։ Այս գիրքը հայտնաբերվելու փաստը եւս ներառվել է մեղադրական զեկույցում։
Նշենք, որ Բագրատունիների մասին իր հայտնի նզովքում խոսել էր Ֆեթուլլահ Գյուլենը։ Դրանից հետո ամբողջ Թուրքիայում ինտերնետով փնտրում էին, թե ովքեր են Բագրատունիները։
Ըստ որոշ թուրք հետազոտողների, Բագրատունիները Թուրքիայում գաղտնի խմբավորում են, ովքեր ճանաչում են միմյանց ու ապրում հատուկ կանոններով։ Այսինքն, Թուրքիայի Բագրատունիներն արտաքուստ մուսուլման են, սակայն ծպտյալ հայ են։ Իսկ որոշ թուրք լրագրողներ շեշտում են` Թուրքիայում Բագրատունիները ազդեցիկ պաշտոններ են զբաղեցնում ու կարեւոր դերակատարներ են Թուրքիայի կյանքում։
Leave a Reply