Դինքի սպանության գործով մեղադրյալը վերահաստատել է, որ պարբերաբար կապի մեջ է եղել Էրդողանի հետ

Ստամբուլի թիվ 14 ծանր հանցագործությունների դատարանում երեկ շարունակվել է պոլսահայ լրագրող, «Ակօս» թերթի հիմնադիր և նախկին խմբագիր Հրանտ Դինքի սպանության գործով դատական նիստը:

Նախօրեին կայացած նիստի ընթացքում իր հերթական պաշտպանական ճառով հանդես է եկել մեղադրյալներից Ստամբուլի ոստիկանության հետախուզական բաժնի նախկին բարձրաստիճան պաշտոնյա Ալի Ֆուաթ Յըլմազերը:

Նա պնդել է, որ Դինքի սպանության գործով դատական գործընթացն ի սկզբանե որոշ ուժերի կողմից ենթարկվում է տարբեր մանիպուլյացիաների: Ըստ Յըլմազերի՝ դա նրանց հաջողվել է:

Մեղադրյալը նաև նշել է, որ գործի շրջանակում հարցաքննության ենթարկվող Տրապիզոնի հետախուզական կոմիտեի նախկին բարձրաստիճան պաշտոնյաներն ամբողջ ճշմարտությունը չեն պատմում դատարանին։

«Կա մի կետ, որի վերաբերյալ նրանք լռում են», – ասել է Յըլմազերը:

Նա նաև վերահաստատել է, որ Էրգենեքոնի հետ կապված հետաքննության շուրջ պարբերաբար կապ է պահպանել Էրդողանի հետ, որն այն ժամանակ զբաղեցնում էր վարչապետի պաշտոնը:

Հիշեցնենք, որ ավելի վաղ տեղի ունեցած դատական նիստերից մեկի ընթացքում Յըլմազերը հայտարարել էր, որ Դինքի սպանության գործը որևէ կապ չունի գյուլենականների հետ, և հաստատել այն տեսակետը, որ Դինքի սպանության հետևում կանգնած է Էրգենեքոն ծայրահեղական ահաբեկչական գաղտնի խումբը, որի ղեկավարներից է ազգայնական գործիչ Վելի Քյուչյուքը:

http://www.tert.am/am/news/2017/04/11/erdogan-yilmazer-dink/2337511