Պոլսո պատրիարքի տեղապահ ընտրված Գարեգին արքեպիսկոպոս Բեքչյանը և պատրիարքի փոխանորդի աթոռից չհրաժարվող Արամ արքեպիսկոպոս Աթեշյանը երկուշաբթի են հանդիպել և առանձնազրույց ունեցել, սակայն մանրամասները կհրապարակվեն հետո՝ զեկույցի տեսքով:
Այս մասին Tert.am-ի հետ զրույցում ասաց Պոլսո պատրիարքարանի Կրոնական ժողովի ատենապես Սահակ Մաշալյանը՝ նշելով, որ մանրամասների մասին խոսելը խառնաշփոթ իրավիճակ կստեղծի:
«Այնպես որ բոլոր փուլերն անցկացնելուց հետո պաշտոնական հաղորդագրություն կստանաք»,- ասաց նա:
Սահակ Մաշալյանը նշեց, որ տեղապահ ընտրված Գարեգին Բեքչյանը պատրիարքարանում չի մնում, քանի որ Արամ Աթեշյանը նրան պատրիարքարանում գրասենյակ չի տրամադրել:
«Գարեգին Բեքչյանն էլ արհամարհանք համարեց: Քանի դեռ նրան աշխատասենյակ չեն տրամադրել, նա չի կարող մնալ պատրիարքարանում»,- ասաց նա:
Սահակ Մաշալյանը նշեց, որ հիմա Ստամբուլի հայ հոգևորականները պատրաստվում են Ավագ շաբաթը նշելուն: Մինչև Հարության տոն, որևէ գործընթաց` տեղապահի ընտրությունների հետ կապված, չի տարվելու. «Դրանից հետո Թուրքիայում ընտրություններն են: Այնուհետև կկատարվի այն, ինչը որ պատշաճ է»:
Սահակ սրբազանը հույս հայտնեց, որ Արամ Աթեշյանը մինչ այդ կհամոզվի, վեհափառ հայրապետի, հայ առաքելական եկեղեցու եպիսկոպոսների կողմից ընդունված, կանոնավոր կերպով ընտրված տեղապահին կճանաչի:
Հարցին, թե ով է առաջիկայում անցկացնելու եկեղեցական տոները պատրիարքարանում, Սահակ Մաշալյանը պատասխանեց, որ ո՛չ Գարեգին Բեքչյանը, ոչ էլ Արամ Աթեշյանը, այլ Պոլսի Հայոց պատրիարքարանի հոգևոր խորհրդի առաջնորդ, ծայրագույն վարդապետ Թաթուլ Անուշյանը:
«Այս պահին մենք դա քննարկման առարկա չենք դարձնում՝ խաղաղության և սիրո համար, որովհետև Զատիկը կարևոր տոն է. մեր գործն է այն խաղաղությամբ տոնելը»,- ասաց նա:
Սահակ Մաշալյանի հավաստմամբ՝ մինչ եկեղեցական տոների և Թուրքիայում սահմանադրական հանրաքվեի ավարտը Պոլսո պատրիարքի տեղապահ Գարեգին Բեքչյանը մնալու է Ստամբուլում:
«Գարեգին Բեքչյանն այլևս աշխատելու է Ստամբուլում: Նա նախօրոք արած ժամադրություններ ունի: Նա հիմա հաստատված է Թուրքիայում»,- ասաց նա:
http://www.tert.am/am/news/2017/04/06/mashalyan/2333296
Leave a Reply