Թուրքիա պետությունը, ըստ սահմանադրության, չի կարող միջամտել Պոլսո Հայոց պատրիաքի ընտրությանը. Մաշալյան

Պոլսո Հայոց պատրիարքարանի Եկեղեցական խորհրդի նախագահ Սահակ եպիսկոպոս Մաշալյանը մեղադրել է Պոլսո Հայոց պատրիարքի փոխանորդի պաշտոնում մնալ շարունակող Արամ Աթեշյանին`Պոլսո Հայոց պատրիարքի ընտրությունների շուրջ Ստամբուլի նահանգապետարանում տեղի ունեցած բանակցությունների մասին տեղեկություները խեղաթյուրելու համար:
Ինչպես հայտնում է «Ակօսը», Մաշալյանը շեշտել է, որ «Թուրքիա պետությունն օրինական ձևով չի կարող միջամտել Պոլսո պատրիարքի ընտրություններին, քանի որ դա բացառապես եկեղեցական կարգով լուծվող խնդիր է, և Աթեշյանի` պետության արգելքների ու «անհարմար հանգամանքների» մասին պնդումները աբսուրդ են»:
«Քրիստոնյա համայնքներն այս երկրում պետք է ունենան կրոնական ազատություն և իրենց կրոնական ծեսերն անցկացնելու իրավունք: Դա ամրագրված է նաև սահմանադրությամբ», – ասել է Մաշալյանը:
Հիշեցնենք, որ փետրվարին Էջմիածնում կայացված որոշման համաձայն՝ մարտի 15-ին Ստամբուլում տեղի է ունեցել Պոլսո Հայոց պատրիարքի տեղապահի ընտրություն: Ընտրությունից հետո, որում համոզիչ հաղթանակ է տարել Արամ Աթեշյանի հակառակորդ Գարեգին արքեպիսկոպոս Բեկչյանը, անակնկալ կերպով միջամտել է Ստամբուլի նահանգապետարանը: Ստամբուլի նահանգապետի տեղակալը նախքան պատրիարքարանում ընտրությունների սկսվելը ուղարկել էր գրություն, որն իրավաբանորեն անհնար էր համարում պատրիարքական ընտրությունների գործընթացի մեկնարկը: Այս գրությունը Պոլսո Հայոց պատրիարքի տեղապահի ընտրություններից անմիջապես հետո պատրիարքարանի հոգևորականներին էր ներկայացրել տեղապահի ընտրություններում պարտված փոխանորդ Արամ արքեպիսկոպոս Աթեշյանը և հայտարարել, որ չի հեռանա տեղապահի պաշտոնից:
Նշենք, որ օրեր առաջ Արամ Աթեշյանն ու Սահակ Մաշալյանը հանդիպում էին ունեցել Ստամբուլի փոխնահանգապետի հետ: Պոլսո պատրիարքարանի եկեղեցական խորհրդի նախագահը դրական և արդյունավետ էր գնահատել անցկացված հանդիպումն ու շեշտել, որ այն անցել է բարիդրացիական մթնոլորտում:
Արդեն նախօրեին արքեպիսկոպոս Բեկչյանի` Ստամբուլ ժամանելուն պես Արամ Աթեշյանը հրաժարվել էր ընդունել արքեպիսկոպոս Բեկչյանին` որպես Պոլսո Հայոց պատրիարքի տեղապահ: Հայտնի է նաև, որ հրավիրված ժողովի ընթացքում Աթեշյանը երկու անգամ լքել էր ժողովի սենյակը:
Հանդիպման ընթացքում պայմանավորվածություն էր ձեռք բերվել պատրիարքարանի կողմից պաշտոնական նամակ կազմել, որն էլ կուղղվի Էջմիածին:

http://www.tert.am/am/news/2017/04/05/mashalyan/2332160