Գարեգին Բեքչյանին ուղղված վեհափառի օրհնությունը շատ ուրախալի լուր էր․ Սահակ Մաշալյան

Գարեգին Բեքչյանին ուղղված օրհնությունը շատ ուրախալի լուր էր․ Tert.am-ի հետ զրույցում այսպես ասաց Պոլսո պատրիարքարանի  եկեղեցական խորհրդի նախագահ Տ. Սահակ եպիսկոպոս Մաշալյանը՝ խոսելով Ամենայն Հայոց Կաթողիկոսի՝  Կ. Պոլսո Հայոց Պատրիարքության ընտրյալ տեղապահին ուղղված օրհնության մասին:
«Գարեգին Բեքչյան սրբազանը եկեղեցականորեն ընտրված մեր համայնքի ընտրյալ տեղապահն է մինչև ընտրությունները: Ինքը պետք է տանի պոլսահայ աթոռը և համայնքը»,- ասաց Սահակ սրբազանը` նշելով, որ վերջերս եկեղեցում տեղի ունեցած հակասությունները պետք է հարթվեն հատկապես պետության հետ:
Սահակ Մաշալյանը նշեց, որ ընտրյալ տեղապահ Գերմանիայի թեմի առաջնորդ Գարեգին Բեքչյանը, որն այս ընթացքում Գերմանիայում էր, Ստամբուլ է վերադառնալու:  Իսկ Արամ Աթեշյանը, ըստ նրա, դեռևս չի արձագանքել Էջմիածնից ուղղված օրհնությանը:
«Որովհետև ուրբաթ գիշերն է վեհափառը հղել: Պատրիարքարանի դռները փակ էին, բայց, հավանաբար, երկուշաբթի կլինի պաշտոնական հայտարարություն»,- ասաց նա:
Դիտարկմանը, թե արդյոք Արամ Աթեշյանը կարող է խոչընդոտել Գարեգին Բեքչյանին նրա վերադարձից հետո անգամ այն պարագայում, որ վեհափառն իր օրհնությունն ուղղել է նրան, Սահակ Մաշալյանը պատասխանեց․ «Հուսամ՝ ոչ: Որովհետև այլևս խոչընդոտելու իմաստ չկա: Վստահ եմ, որ Արամ Աթեշյանը ողջախոհությամբ կմոտենա, մենք էլ պետք է համակերպվենք, այս երկու շաբաթը համերաշխությամբ անցկացնենք»:

http://www.tert.am/am/news/2017/04/01/mashalyan/2327341