Պոլսո հայոց պատրիարքական տեղապահի ընտրությունների արդյունքները հայտնի դառնալուց հետո պարտված կողմ արք. Արամ Աթեշյանի քայլին է անդրադարձել Ժողովրդահանրապետական (CHP) կուսակցության հայ պատգամավոր Սելինա Դողանը։
Ստամբուլի հայկական «Ակօս»–ի հետ զրույցում իրավաբան, պատգամավոր Սելինա Դողանը նշել է, թե Ստամբուլի նահանգապետարանի միջամտությունը պատրիարքի ընտրությանը իրավական հիմքեր չունի։ «Անընդունելի է նահանգապետարանի գրությունը։ Գրության մեջ մեջբերվում է փետրվարի 16–ի հավաքը պատրիարքարանում։ Այնտեղ նշվում է, թե իբր այս ամենի դեմ հայ հասարակության խիստ արձագանքը կա։ Այո, կա, բայց այդ խիստ արձագանքը հենց ուղղված է փոխպատրիարքի դեմ։ Եթե հասարակության արձագանքը կարեւոր է նահանագապետարանի համար, ուրեմն պետք չէ միջամտել պատրիարքի ընտրության գործընթացին։ Այդ միջամտությունն ավելի խառը իրավիճակ է ստեղծելու»,–ասել է Սելինա Դողանը։
Նշենք, որ Տեղապահի ընտրություններում թեկնածուներ են եղել փոխպատրիարք արք. Արամ Աթեշյանն ու Գերմանիայի հայոց թեմի առաջնորդ, արք. Գարեգին Բեքչյանը։ Երբ ընտրությունների վերջում հայտնի է դարձել, որ հաղթել է Գարեգին Բեքչյանը, փոխպատրիարք, արք. Արամ Աթեշյանը լրագրողներին ցույց է տվել նահանգապետարանի գրությունը, թե պատրիարքի ընտրությունների հետ կապված գործընթացը իրավական չէ։
Leave a Reply