Ստամբուլում վերսկսվել է Հրանտ Դինքի սպանության գործով դատավարությունը

Ստամբուլի Չաղլայան արդարադատության պալատում մեկնարկել են պոլսահայ լրագրող, «Ակօս» թերթի հիմնադիր և նախկին խմբագիր Հրանտ Դինքի սպանության գործով դատական նոր նիստերը:

Ինչպես գրում է «Ակօս»-ը, նոր նստաշրջանում կհարցաքննվեն Թուրքիայի ներքին գործերի նախկին նախարար և Դինքի սպանության ժամանակ Ստամբուլի նահանգապետի պաշտոնը զբաղեցրած Մուամմեր Գյուլերը, նախկին ոստիկանապետեր Հանեֆի Ավջըն ու Ռեջեփ Գյուվենը, նախկին փոխոստիկանապետեր Հաքան Այդըն Թյուրքելին ու Էմին Արսլանը, Դինքի սպանության ժամանակ Տրապիզոնի նահանգապետի պաշտոնը զբաղեցրած Հուսեյն Յավուզդեմիրը, Ստամբուլի ոստիկանության՝ ահաբեկչության դեմ պայքարի գրասենյակի նախկին ղեկավար Սելիմ Քութքանը, նախկին տեսուչ Այշեգյուլ Գենչն ու լրագրող Նեդիմ Շեները:

Նախատեսվում է, որ դատական նիստերը կանցկացվեն մարտի 14-ին, 16-ին և 17-ին:

Դատական առաջին նիստի մեկնարկից առաջ Չաղլայան պալատի դիմաց են հավաքվել «Հրանտ Դինքի ընկերներ» նախաձեռնության անդամներն ու պարզել «Հանուն Հրանտի, հանուն արդարության» գրությամբ պաստառներ:

Հիշեցնենք, որ պոլսահայ հայտնի լրագրող, մտավորական, «Ակօս» թերթի հիմնադիր և խմբագիր Հրանտ Դինքը սպանվել է 2007թ. հունվարի 19-ին, Ստամբուլի Շիշլի թաղամասում գտնվող «Ակօս» թերթի խմբագրատան առջև` 16-ամյա թուրք ազգայնական Օգյուն Սամասթի կրակոցից: Հրանտ Դինքի սպանության վերաբերյալ դատավարությունը ձգվում է արդեն 10 տարի և դեռևս չի գտել իր հանգուցալուծումը:

http://www.tert.am/am/news/2017/03/13/hrant-dink/2306442