Պոլսո Հայոց պատրիարքի տեղապահի պաշտոնի համար ներկայացվել է երեք թեկնածուի անուն. «Ակօս»

Պոլսո Հայոց պատրիարքի տեղապահի ընտրության համար ներկայացվել է երեք թեկնածուի անուն, գրում է Ստամբուլի հայկական պարբերականներից «Ակօսը»:

Ըստ պարբերականի`պատրիարքի տեղապահի պաշտոնին հավակնում են Պոլսո Հայոց պատրիարքարանի եկեղեցական խորհրդի նախագահ, Տ. եպիսկոպոս Սահակ Մաշալյանը, Պոլսո պատրիարքի փոխանորդ, արքեպիսկոպոս Արամ Աթեշյանն ու Գերմանիայի հայ համայնքի հոգևոր առաջնորդ, եպիսկոպոս Գարեգին Բեկչյանը:

Նշենք, որ պատրիարք Մութաֆյանը կոմայի մեջ է գտնվում 2008թ. և փաստացի չի գործում որպես պատրիարք: Նրա փոխարեն այդ լիազորությունները կատարում է արքեպիսկոպոս Արամ Աթեշյանը, որն ընտրված է ոչ թե համայնքի, այլ պետության կողմից:

Ստամբուլի հայ համայնքի ներկայացուցիչները տևական ժամանակ է՝ պահանջում էին կայացնել նոր ընտրությունների անցկացման որոշումը՝ ցանկանալով իրենց առաջնորդի դերում տեսնել ոչ թե պետության կողմից նշանակված, այլ իրենց ձայների արդյունքում ընտրված անձի:

Մարտի 15-ին կայանալիք տեղապահի ընտրության ընթացքում պարզ կդառնա Պոլսո պատրիարքի նոր տեղապահի անունը, որն էլ իր հերթին կպարտավորվի հետամուտ լինել պատրիարքի ընտրությունների նախապատրաստմանն ու անցկացմանը:

Հիշեցնենք, որ Տ. Սահակ եպիսկոպոս Մաշալյանը հրաժարական էր տվել, ինչպես նաև հայտնել պատրիարքի ընտրություններում իր թեկնածությունը չառաջադրելու և Ստամբուլը հիմնովին լքելու մասին: Մաշալյանն իր որոշման համար մեղադրել էր պատրիարքի փոխանորդ Աթեշյանին և հայտարարել, որ վերջինս ամեն կերպ խոչընդոտում է նախընտրական գործընթացին ու խախտում եկեղեցական կարգը՝ փոխպատրիարքի աթոռին մնալով մանիպուլյացիայի և սպառնալիքների միջոցով: Մաշալյանը շեշտել էր, որ 2016թ. հոկտեմբերի 26-ից, երբ եկեղեցական խորհուրդն ընդունեց 2008թ. ի վեր կոմայի մեջ գտնվող պատրիարք Մեսրոպ Մութաֆյանի պաշտոնանկության և պատրիարքի աթոռի պաշտոնապես թափուր լինելու մասին հայտարարությունը, Աթեշյանի՝ փոխպատրիարքի պաշտոնում մնալն այլևս անօրինական է, քանի որ նախընտրական գործընթացի մեկնարկին զուգահեռ պետք է ընտրվեր պատրիարքի տեղապահ, մինչդեռ եկեղեցական խորհուրդն աչք է փակել այս ամենի վրա:

Համայնքային մի շարք ժողովների ընթացքում որոշվել էր իրավիճակը հարթելու համար ընտրություններ կազմակերպել մայիսի 28-ին, իսկ Արամ Աթեշյանը պետք է շարունակեր մնալ փոխանորդի պաշտոնում: Այս որոշումը, սակայն, առկախվել է Գարեգին Բ Ամենայն Հայոց Կաթողիկոսի միջամտությամբ, որն էլ երեք բարձրաստիճան պաշտոնյաներին հրավիրել էր Էջմիածին՝ հարցի շուրջ լուծումներ փնտրելու:

Փետրվարի 23-24-ին Էջմիածնում Գարեգին Բ Ամենայն Հայոց Կաթողիկոսի նախագահությամբ տեղի ունեցած հանդիպումների ընթացքում որոշվել է մարտի 15-ին դադարեցնել Պոլսո Հայոց պատրիարքի փոխանորդ Արամ Աթեշյանի լիազորություններն ու ընտրել պատրիարքի տեղապահ և վերջինիս գլխավորությամբ հետամուտ լինել պատրիարքի ընտրությունների նախապատրաստմանն ու անցկացմանը:

http://www.tert.am/am/news/2017/03/09/istanbul-armenians/2302838