Կռիվ չկա, հաշտություն կա. Սահակ Մաշալյանը՝ իր և Արամ Աթեշյանի հարաբերությունների մասին

Վեհափառի հետ Մայր աթոռ Սուրբ Էջմիածնում հանդիպումները շատ արդյունավետ են անցել, խաղաղություն կնքվեց․ Tert.am-ի հետ զրույցում այսպես ասաց Պոլսո Հայոց պատրիարքարանի եկեղեցական խորհրդի նախագահ, եպիսկոպոս Տ. Սահակ Մաշալյանը՝ անդրադառնալով Պոլսո պատրիարքի փոխանորդ Արամ Աթեշյանին ուղղված քննադատություններից հետո ստեղծված իրավիճակին:

«Պայմանավորվածություն եղավ, որ տեղապահ պետք է ընտրել, և տեղապահի ընտրության հետ միասին պատրիարքի ընտրության գործընթացը պետք է մեկնարկի»,- նշեց սրբազանը:

Նա համարեց, որ այլևս ոչինչ չի խոչընդոտելու Պոլսո պատրիարքի ընտրությանը: Նա նաև նշեց, որ քիչ հավանականություն կա, որ տեղապահի պաշտոնում Արամ Աթեշյանն ընտրվի: «Ժողովրդի ցանկությունն է, որ նորություն լինի, ինը տարի պատրիարքի փոխանորդի աթոռը զբաղեցնող Արամ Աթեշյանին չեն ցանկանում տեսնել: Բայց այս հարցը եկեղեցականներն են որոշում»,- ասաց նա՝ նշելով, որ ինքն անձամբ, որպես տեղապահի թեկնածու, առաջարկել է Գերմանիայի թեմի առաջնորդ Գարեգին Բեքչյանին. «Բայց առաջարկել ենք, որ Արամ Աթեշյանն էլ առաջադրվի, որ խաղաղ ընթացք լինի»:

Չնայած նախկինում արած պնդումներին, թե ինքը պատրիարքարան չի վերադառնա, մինչև Արամ Աթեշյանը չլքի այն, հիմա Սահակ սրբազանն այնտեղ է: «Հիմա մեր հարաբերությունները նորմալացնելու ճանապարհին ենք: Նախկինի պես չեն, բայց պետք է միասին աշխատենք, պետք է խաղաղությամբ գործերն առաջ տանենք: Կռիվ չկա, հաշտություն կա»,- ասաց նա:

Հարցին, թե ինքը դեռ իր կարծիքի՞ն է, որ Արամ Աթեշյանը Պոլսո պատրիարքի փոխանորդի աթոռը ինը տարի պահել է մանիպուլյացիաների շնորհիվ, պատասխանեց․«Դա իմ պնդումը չէ, դա իրականություն է: Դրա համար է, որ ամբողջ ժողովուրդը ոտքի էր կանգնած»,- ասաց նա՝ նշելով, որ խնդիրը բարձրաձայնելու պատասխանատվությունն ինքը որոշեց իր վրա վերցնել: Հիմա, ըստ նրա, Արամ Աթեշյանն էլ համաձայնեց, որ պետք է պատրիարքի ընտրություններ անցկացվեն:

Սահակ սրբազանի խոսքով՝ Թուրքիայի հայ համայնքը կհանգստանա միայն այն ժամանակ, եթե տեղապահի աթոռին Արամ Աթեշյանին չտեսնի: «Արամ սրբազանի տեղապահությունը խաղաղություն չի բերի: Բայց իր օրինավոր իրավունքն է առաջադրվելը: Թե ինչպիսին կլինեն հետևանքները՝ չգիտենք, չգիտենք նաև, թե ինչպիսին կլինեն ժողովրդի արձագանքները»,- ասաց նա:

Սահակ Մաշալյանը նշեց, որ պատրիարքարանի ընտրությունները, ամենայն հավանականությամբ, կլինեն Թուրքիայում սպասվող սահմանադրական հանրաքվեից հետո։ Մայիսին կամ հունիսին Պոլսո պատրիարքարանն արդեն նոր պատրիարք կունենա: «Պետք է, որ համայնքի ցանկություններին համապատասխան պատրիարք ընտրվի, քանի որ վիճակը ծայրահեղ է, և այստեղ միայն պատրիարքի հարցը չէ, այլև համայնքի անգլուխ և անիշխան լինելու հարցն է»,- ասաց նա:

Հիշեցնենք, որ Տ. Սահակ եպիսկոպոս Մաշալյանը հրաժարական էր տվել, ինչպես նաև հայտնել պատրիարքի ընտրություններում իր թեկնածությունը չառաջադրելու և Ստամբուլը հիմնովին լքելու մասին: Մաշալյանն իր որոշման համար մեղադրել էր պատրիարքի փոխանորդ Աթեշյանին և հայտարարել, որ վերջինս ամեն կերպ խոչընդոտում է նախընտրական գործընթացին ու խախտում եկեղեցական կարգը՝ փոխպատրիարքի աթոռին մնալով մանիպուլյացիայի և սպառնալիքների միջոցով: Մաշալյանը շեշտել էր, որ 2016թ. հոկտեմբերի 26-ից, երբ եկեղեցական խորհուրդն ընդունեց 2008թ. ի վեր կոմայի մեջ գտնվող պատրիարք Մեսրոպ Մութաֆյանի պաշտոնանկության և պատրիարքի աթոռի պաշտոնապես թափուր լինելու մասին հայտարարությունը, Աթեշյանի՝ փոխպատրիարքի պաշտոնում մնալն այլևս անօրինական է, քանի որ նախընտրական գործընթացի մեկնարկին զուգահեռ` պետք է ընտրվեր պատրիարքի տեղապահ, մինչդեռ եկեղեցական խորհուրդն աչք է փակել այս ամենի վրա:

Համայնքային մի շարք ժողովների ընթացքում որոշվել էր իրավիճակը հարթելու համար ընտրություններ կազմակերպել մայիսի 28-ին, իսկ Արամ Աթեշյանը պետք է շարունակեր մնալ փոխանորդի պաշտոնում: Այս որոշումը, սակայն, առկախվել է Գարեգին Բ Ամենայն Հայոց Կաթողիկոսի միջամտությամբ, որն էլ երեք բարձրաստիճան պաշտոնյաներին հրավիրել էր Էջմիածին՝ հարցի շուրջ լուծումներ փնտրելու: Մայր աթոռ Սուրբ Էջմիածնում պատրաստվել էր հայտարարություն, ըստ որի, Պոլսո պատրիարքի տեղապահի ընտրությունները պետք է տեղի ունենան մարտի 15-ին, իսկ մինչ այդ Արամ արքեպիսկոպոս Աթեշյանը պետք է հրաժարվի պատրիարքի փոխանորդի աթոռից:

Հռիփսիմե Հովհաննիսյան

http://www.tert.am/am/news/2017/03/03/Mashalyan-Ateshayan/2296012