Իտալիայում գիրք է լույս տեսել Առաջին աշխարհամարտի ժամանակ Օսմանյան կայսրությունում Վատիկանի դիվանագիտական առաքելության մասին: Այս մասին գրում է La Stampa պարբերականը: «Սուրբ աթոռը եւ Օսմանյան կայսրությունում հայերի կոտորածը» գրքի հեղինակներն են Վալենտինա-Վարդուհի Կարախանյանն ու Օմար Վիգանոն:
Գրքի առանցքում Կոնստանդնուպոլսում Պապի բանագնաց, միսիոներ Անջելո Մարիա Դոլչիի գործունեությունն է: Նրա վիճակը բարդ էր նրանով, որ կոտորածի ենթարկված քրիստոնյաների մեծ մասը Թուրքիայի արեւելյան շրջաններից էին՝ մայրաքաղաքից հարյուրավոր կիլոմետրեր այն կողմ: Բայց երբ Դոլչին սկսեց հասկանալ, թե ինչ է տեղի ունենում, նա շարունակեց բոլոր ջանքերը՝ բանակցություններ անցկացնելու համար, եւ ոչ միայն օսմանյան իշխանությունների հետ, այլեւ` նրանց ավստրիացի եւ գերմանացի դաշնակիցների:
Նրա նամակներից եւ կազմած փաստաթղթերից պարզ է դառնում, թե ինչ ջանքեր է գործադրել հայերի եւ այլ քրիստոնյաների փրկության համար՝ չնայած սահմանափակ լիազորություններին ու ֆինանսական հնարավորություններին:
Հետապնդվող քրիստոնյաներին պաշտպանել է նաեւ Հռոմի Բենեդիկտոս 15-րդ պապը, որը երեք անգամ դիմել է Մեհմեդ 5-րդ սուլթանին: Սուլթանին հասցեագրված նամակներ է ուղարկել նաեւ Դոլչին՝ հնարավոր գրաքննությունից խուսափելու համար:
Գրքի առաջաբանում նշվում է, որ Վատիկանի ջանքերն առավել տեսանելի են նրա միայնության համատեքստում, քանի որ արեւմտյան գերտերություններն այն ժամանակ ավելի շատ մտահոգվում էին իրենց ռազմավարական ջանքերով, քան հավատակից եղբայրների ճակատագրով:
Գիրքը նվիրված է 2015 թ. վախճանված կաթոլիկ հայերի պատրիարք «Ներսես Պետրոս 19-րդի վառ հիշատակին»:
https://news.am/arm/news/376814.html
Leave a Reply