Ցույց տանք մեր` այս հողերի հանդեպ ունեցած հազարամյա կապվածությունը. Մեջլիսի հայազգի պատգամավոր Սելինա Դողան

Թուրքիայի ընդդիմադիր Ժողովրդահանրապետական կուսակցության անդամ, Մեջլիսի հայ կին պատգամավոր Սելինա Դողանն այսօր Ստամբուլում կայացած հատուկ մամուլի ասուլիսի ընթացքում կոչ է արել Թուրքիայի ազգային և կրոնական փոքրամասնություններին դեմ քվեարկել ապրիլի 16-ին սպասվելիք սահմանադրական փոփոխությունների հանրաքվեի ժամանակ:

Այս մասին Tert.am-ին հայտնեցին Սելինա Դողանի մամուլի ծառայությունից:
Հանդիպման ընթացքում հայազգի պատգամավորը շեշտել է, որ եթե ապրիլի 16-ին իշխանությունների կողմից առաջարկվող սահմանադրական փոփոխությունների փաթեթն իր` կառավարման նախագահական համակարգի անցնելու մասին առաջարկով ստանա ձայների մեծամասնությունը` կնշանակի, որ Թուրքիայում վերջնականորեն հաղթանակ է տոնելու բռնակալ համակարգը:

«Մենք շատ մտահոգ ենք, բայց չենք էլ ուզում լքել այս հողերը: Ուզում եմ այստեղից դիմել այս երկրի բոլոր կրոնական փոքրամասնություններին. ապրիլի 16-ին մենք պետք է ցույց տանք մեր` այս հողերի հանդեպ ունեցած հազարամյա կապվածությունը», – ասել է Դողանը:

Նշենք, որ հունվարի 21-ին Թուրքիայի խորհրդարանը ձայների մեծամասնությամբ հավանություն է տվել Սահմանադրությունում փոփոխությունների իրականացման փաթեթին, որն առաջարկում է անցում կատարել կառավարման նախագահական համակարգին: 18 հոդվածից բաղկացած օրենքի ընդունմանը կողմ է քվեարկել 339 պատգամավոր:

Էրդողանը պնդում է Թուրքիայում կառավարման նախագահական համակարգի սահմանման հարցում՝ խորհրդարանականի փոխարեն, որը երկրում գործում է 1923-ին Թուրքիայի Հանրապետության կազմավորման սկզբից ի վեր:

http://www.tert.am/am/news/2017/02/24/selina-dogan/2289635