Ինքնուրույն, նախաձեռնող ու կարծրատիպեր կոտրող. թուրքական կայքը համշենցի կանանց մասին

Համշենցի հայտնի երաժիշտ և երգչուհի Այշենուր Քոլիվարը Gazetesujin.com կայքում հատուկ անդրադարձ է կատարել Թուրքիայի սևծովյան շրջանի արևելյան հատվածի կանանց (այդ տարածքում բնակվում են հիմնականում համշենցի հայեր և քարթվելական ծագում ունեցող լազեր-Tert.am)՝ հասարակության մեջ նրանց ունեցած դերին և առանձնահատկություններին։

Քոլիվարն ուշադրություն է հրավիրում այն փաստի վրա, որ համշենցի կանայք շատ ավելի ինքնուրույն և նախաձեռնող են, քան Թուրքիայի արևելյան բազմաթիվ շրջաններում բնակվող կանայք: Հեղինակն ընդգծում է, որ Համշենում կանայք վաղուց կոտրել են այն կարծրատիպերը, թե տան և ընտանեկան հոգսերից դուրս կինը լուրջ դերակատարում չունի և չի կարող կատարել այնպիսի գործեր, որոնք արևելյան մենթալիտետի համաձայն` հասու են միայն տղամարդկանց:

Համշենցի երգչուհին շեշտում է, որ դա ավելի շատ կապված է Սևծովյան շրջանի տղամարդկանց` բավականին հաճախ արտագնա աշխատանքի մեկնելու հանգամանքի հետ, որի ընթացքում համշենցի կանայք ստանձնել են տան առաջնորդի դերն ու փորձել իրենց ուժերն ամենատարբեր ոլորտներում, որտեղից էլ պատվով են դուրս եկել:

Միևնույն ժամանակ, Այշենուր Քոլիվարն ընդգծում է, որ ինչպես ամբողջ Թուրքիայում, այնպես էլ պատմական Համշենի տարածքում կանանց համար առավել նշանակալից են եղել վերջին 50 տարվա պատմական շրջադարձերն ու թուրքական հասարակության արդիականացման ընթացքը, որն իր հետքն է թողել նաև համշենցի կանանց կրթության ու հասարակական աշխատանքի բնագավառում ակտիվացման կամ այդ բնագավառներում ներառվելու իրավունքի համար պայքարելու հարցում:

http://www.tert.am/am/news/2017/02/23/hamshen/2287837