Համայնքը ցանկանում է, որ Արամ Աթեշյանը հրաժարական տա, բայց կարևոր է նաև, որ օրենքները փոխվեն. Սելինա Դողան

Թուրքիայի Մեջլիսի Ժողովրդահանրապետական կուսակցության հայազգի պատգամավոր Սելինա Դողանը Tert.am-ի հետ զրույցում նշեց, որ թուրքահայ համայնքը հիմա միայն ցանկանում է, որ Պոլսո պատրիարքի փոխանորդ Արամ Աթեշյանը հրաժարական տա, բայց անձամբ իր համար կարևոր է, որ պատրիարքարանի հարցերով ոչ միայն հոգևորականները զբաղվեն, այլ նաև՝ համայնքը:

«Բազմաթիվ խնդիրներ առաջ եկան Արամ Աթեշյանի օրոք»,- նշեց նա՝ հավելելով, որ հասարակության ներգրավվածությունով արդեն համայնքի կառավարման մեջ խնդիրները կքչանան:

Նա նշեց, որ մինչ այժմ համայնքի հարցերով զբաղվում էր միայն պատրիարքարանը, սակայն ճիշտ կլինի, որ օրենքները փոխվեն, և աշխարհիկներն էլ մասնակից դառնան համայնքի կառավարմանը:

«Մենք կուզենք, որ անմիջապես պատրիարքարանի ընտրությունները տեղի ունենան, բայց նաև պետք է եկեղեցական օրենքները փոխվեն»,- ասաց նա:

Սելինա Դողանը նաև նշեց, որ վերջին 9-ը տարիների ընթացքում Թուրքիայում քաղաքական իրավիճակի պատճառով հայ համայնքը բավականին պասիվ էր: Նա նաև մատնանշեց, որ պատրիարքարանի ձեռքում է եղել համայնքի ամբողջ մշակութային և նյութական հարստությունը, ինչը, իր կարծիքով, սխալ էր:

Հիմա Թուրքիայի հայերը սպասում են, թե ինչ կլինի հինգշաբթի օրը․ Մայր աթոռ Սուրբ Էջմիածնում, Ամենայն Հայոց Կաթողիկոսի հրավերով Պոլսո պատրիարքարանի շուրջ ստեղծվածը պետք է քննարկեն Պոլսո պատրիարքարանի Հոգևոր խորհրդի նախագահ Սահակ եպիսկոպոս Մաշալյանը, Պոլսո պատրիարքի փոխանորդ Արամ արքեպիսկոպոս Աթեշյանը և Գերմանիայի թեմի առաջնորդ Գարեգին Բեքչյանը:

Հիշեցնենք, որ պատրիարքարանում իրավիճակը սրեց Պոլսո պատրիարքարանի Հոգևոր խորհրդի նախագահ եպիսկոպոս Մաշալյանը, որը հեռանալով պատրիարքարանից` բաց նամակ գրեց, որում քննադատեց Արամ Աթեշյանին՝ նշելով, որ վերջինս շարունակում է իր պաշտոնին մնալ մանիպուլյացիայի և սպառնալիքների շնորհիվ:

Սելիա Դողանը, խոսելով Էջմիածնում հոգևորականների հետ Ամենայն Հայոց Կաթողիկոսի հանդիպումից իր ակնկալիքների մասին, նշեց, որ վստահ է, որ նրանք խնդրի լուծման մի տարբերակ կգտնեն, բայց դա կլինի որոշում` միայն հոգևորականների մասով:

«Բայց, նորից եմ կրկնում, համայնքում եղած խնդիրը կապված է սխալ կառավարման, մենեջմենթի հետ: Համայնքի հիմնադրամը պետք է կառավարեն ոչ միայն հոգևորականները, այլ նաև աշխարհիկները, այնտեղ ոչ միայն համայնքի նյութական, այլ նաև՝ մշակութային արժեքներն են»,- ասաց նա:

http://www.tert.am/am/news/2017/02/22/turkey/2287024