Ցեղասպանութեան թանգարանը ոսկի յուշամետալով պարգեւատրեց պատմաբան Երուանդ Փամպուքեանը

Ուրբաթ, 10 փետրուարին, Երեւանի մէջ տեղի ունեցաւ սփիւռքահայ մտաւորական, պատմաբան Երուանդ Փամպուքեանի խմբագրութեամբ լոյս տեսած «Նիւթեր ՀՅ Դաշնակցութեան Պատմութեան Համար» խորագիրով մատենաշարի ԺԲ. հատորին շնորհահանդէսը:

Հատորին մէջ ներկայացուած են նաեւ Ցեղասպանութիւնը վերապրածներու վկայութիւնները, զորս հաւաքած է Հայոց Ցեղասպանութեան առաջին վկայագրաղներէն Շաւարշ Միսաքեան:

Երուանդ Փամպուքեան արխիւային փաստաթուղթերու բազմահատոր այս ժողովածուին խմբագիրն է 2009էն ի վեր:

Մտաւորականին եւ անոր վաստակին մասին գնահատանքի խօսքով հանդէս եկաւ նաեւ Հայոց Ցեղասպանութեան թանգարան-հիմնարկի փոխտնօրէն Սուրէն Մանուկեան, որ այս առիթով Երուանդ Փամպուքեանին յանձնեց Հայոց Ցեղասպանութեան թանգարան–հիմնարկի «Ճէյմզ Պրայս» ոսկի յուշամետալը եւ պատուոյ գիրը:

Asbarez.com