Ամենայն Հայոց կաթողիկոս Գարեգին Բ–ի հրավերով Պոլսո աթոռի երեք սրբազաններ՝ Արամ արք. Աթեշյանը, Սահակ եպս. Մաշալյանը և Գերմանիայի հայ համայնքի հոգևոր առաջնորդ, արքեպիսկոպոս Գարեգին Բեկջյանը (երեքն էլ Պոլսո պատրիարքի թեկնածու), օրերս Մայր Աթոռ Սուրբ Էջմիածնում Ամենայն Հայոց կաթողիկոսի ներկայությամբ պետք է ի վերջո վերջնական եզրակացության հանգեն Պոլսում ստեղծված իրավիճակի շուրջ: Պոլսո անկախ պատրիարքության սրբազանների այս որոշումը խոսակցությունների տեղիք է տվել այն առումով, որ պատրիարքությունը համարվում է անկախ աթոռ, սակայն որոշել է Ամենայն Հայոց կաթողիկոսի ներկայությամբ լուծել իր հարցերը: Այս առումով Սահակ եպիսկոպոս սրբազանն «Արևելք»ին հայտնեց. «Այո, մենք անկախ աթոռ ենք, սակայն մյուս կողմից էլ մեզ հրավիրել է Ամենայն Հայոց կաթողիկոսը, որ ծայրագույն պատրիարքն է, և ոչ թե միջամտելու նպատակով է հրավիրել, այլ հարցերը Մայր Աթոռում քննարկելու և հաշտություն կնքելու կամ վերջնական որոշում ընդունելու: Այո, աթոռը ինքնավարություն ունի, բայց ինքնագլուխ չէ, Էջմիածինն այսպիսի հարցերում միջամուխ լինելու, բայց ոչ՝ տրամադրություններ պարտադրելու իրավունք ունի»:
Սահակ սրբազանն «Արևելք»ի հետ զրույցում, ինչպես նախորդ իր հայտարարություններում, պնդեց, որ Արամ արք. Աթեշյանը պետք է հրաժարվի, քանի որ, մեր զրուցակցի խոսքերով, տարիներ շարունակ Պոլսում պատրիարքական ընտրությունները փակուղի է տարել, իր անձնական շահերն ամրապնդելու համար քայլեր չի ձեռնարկել, և այսօր, ինչպես Սահակ Մաշալյանը նշեց, հասել է մի պահ, երբ ժողովուրդն է արդեն դժգոհ այս անելանելի վիճակից: «Ես իմ հրաժարականով բացահայտեցի Արամ Սրբազանի բոլոր սխալները, ասելով նաև, որ պիտի հրաժարվի: Բայց նա չի ուզում հրաժարվել: Նա ուզում է տեղապահ լինել, բայց հնարավոր չէ, քանի որ ժողովուրդը չի ուզում նրան»,-նշեց պատրիարքության Կրոնական ժողովի՝ հրաժարական ներկայացրած ատենապետը:
Սահակ Մաշալյանը նաև ասաց, որ պոլսահայ համայնքում ստեղծված իրավիճակը սոցիալական ցանցերում և մամուլում թուրքերենով է քննարկվում. «Թուրքիայում մենք խայտառակ ենք լինում: Այդ է պատճառը, որ Վեհափառը կանչեց մեզ, ասաց՝ եկեք լուծում գտնենք, եւ պիտի ջանանք լավագույն ելքը գտնել, այնպես անել, որ Արամ Սրբազանը քաշվի, բայց այնպես լինի նաև, որ իր պատիվը չվիրավորվի, քանի որ ինքը ինձ մեղավոր է համարում այս ամեն ինչի համար, իմ տեղապահ լինելս էլ ինքը չի ուզում: Ինքը պիտի տեղի տա և տեղապահ չլինի»,-պարզաբանեց պատրիարքի թեկնածուն:
Կվերադառնա՞ն արդյոք սրբազանները Մայր Աթոռից հաշտությամբ: Այս հարցին Սահակ սրբազանը պատասխանեց.
«Անպայման հաշտություն պիտի լինի, քանի որ եթե մենք՝ եկեղեցականներս, Աստծո, Ավետարանի առջև ելք չկարողանանք գտնել, ինչպե՞ս պիտի մեր քարոզներում խաղաղության կոչենք: Մենք խաղաղության ջատագովներն ենք, իսկ սա անլուծելի հարց չէ, որ չլուծվի»:
Իսկ այն դիտարկմանը, որ նաև տեսակետ է հնչել, թե իրավիճակը հրահրվել է պատրիարքի մյուս թեկնածուի՝ Գուգարաց թեմի առաջնորդ Սեպուհ Չուլջյանի համակիրների կողմից, Սահակ Մաշալյանը պարզապես ծիծաղելի համարեց: «Թուրքիա-Հայաստան ներկա լարված հարաբերությունները հաշվի առնելով` նա նույնիսկ, հնարավոր է, չգրանցվի էլ որպես թեկնածու»,-հայաստանաբնակ սրբազանի մասին ասաց Սահակ արք. Մաշալյանը:
Հիշեցնենք, որ Պոլսո պատրիարքության Կրոնական ժողովի ատենապետ Սահակ եպիսկոպոս Մաշալյանը հրաժարական էր ներկայացրել՝ իր որոշման համար մեղադրելով պատրիարքական փոխանորդ Արամ Աթեշյանին և հայտարարել, որ նա ամեն կերպ խոչընդոտում է նախընտրական գործընթացն ու խախտում եկեղեցական կարգը՝ փոխանորդի աթոռին մնալով մանիպուլյացիայի և սպառնալիքների միջոցով:
Arevelk.am
Leave a Reply