Մաշալյանի հրաժարականը կորուստ կլինի

Միհրան Մանուկյան

Հոգևոր խորհրդի նախագահ, եպիսկոպոս Սահակ Մաշալյանի հրաժարականը, որը մեղադրանքներ էր պարունակում պատրիարքի փոխանորդ Աթեշյանի հասցեին, ստիպեց հիմնադրամների ղեկավարներին գործի անցնել: Նախքան ժողովը, որի ժամանակ նշանակվել է պատրիարքական ընտրությունների օրը, համայնքի հիմնադրամների ղեկավարներն իրենց կարծիքն են հայտնել «Ակօսին»:
Թեև հրաժարականը քննադատողներ էլ կան, սակայն մեծամասնությունն այն կարծիքին է, որ չպետք է Մաշալյանին կորցնել, որպես ղեկավարներ՝ պետք է հստակ իրենց կարծիքն արտահայտեն:

«Համայնքը արյուն է կորցնում»
Իսքենդեր Շահինգյոզ՝ Օրթաքյոյի Սուրբ Աստվածածին եկեղեցու հիմնադրամի նախագահ

Պետք է ամեն ինչ անել, որ նման արժեքավոր և պատրաստված անձը Թուրքիան չլքի: Եթե Սրբազանը գնա, ապա դա Ստամբուլի համայնքի համար մեծ կորուստ կլինի: Այս ամբողջ պատմությունն այն պատճառով է որ Արամ Սրբազանը ձգձգում է գործընթացը, չի թողում, որ այն իր հունով ընթանա: Ասում է` մենք մեր դիմումն ուղարկենք, հանրաքվեից հետո մի բան կլինի, կվերջանա… Սակայն Արամ Սրբազանի պահվածքն անհասկանալի է: Հատկապես ուզում եմ շեշտել, որ համայնքն արնաքամ է լինում: Մեր եկեղեցու հավատացյալների թիվը գնալով քչանում է: Որքան ուզում է` թող պատրիարքի փոխանորդ լինի, որևէ կարևորություն չունի: Մեր համայնքն արժանի չէ այն ամենին, ինչ կատարվում է:

«Հայտարարություն ենք անելու»
Հարություն Շանլը՝ Գեդիկփաշայի Սուրբ Հովհաննես եկեղեցու հիմնադրամի նախագահ և Համայնքային հաստատությունների համագործակցության հարթակի քարտուղար

Նախ` մենք անհապաղ ժողով ենք գումարում (Ժողովն արդեն իսկ կայացել է, որի ժամանակ որոշվել է պատրիաքական ընտրությունների օրը– Ակունքի խմբ.): Օրակարգում Սահակ Սրբազանի հրաժարականն է: Ժողովը կազմակերպելու ենք ոչ միայն Համայնքային հաստատությունների համագործակցության հարթակի, այլև համայքի բոլոր շահագրգիռ կողմերի համար: Մասնակցելու են մեր համայնքի ներկա և նախկին ղեկավարները, անգամ տեղական միությունները: Նաև ջանալու ենք ետ բերել Սահակ Սրբազանին, ինչպես նաև մտածում ենք իրավիճակի հանգուցալուծման համար հայտարարություն անել: Սահակ Սրբազանի գնալը մեր համայնքի համար մեծ կորուստ կլինի, ամեն ինչ անելու ենք, որ նրան  չկորցնենք: Արամ Սրբազանը ժամանակին խոստացավ ընտրություններ անցկացնել, սակայն եթե հիմա փակ դռների հետևից ասում է` «ընտրություններ չեմ անցկացնում», ապա ես հարցականի տակ եմ դնում նրա հոգևորական լինելու փաստը, չեմ հավատում նրան:

«Մեր մեղքով է գործընթացը ձգձգվել»
Պետրոս Շիրինօղլու՝ Սուրբ Փրկիչ հայկական հիվանդանոցի հիմնադրամի և Համայնքային հաստատությունների համագործակցության հարթակի նախագահ
Սա ցավալի դեպք է: Ինձ և մեր համայնքի համար հատկապես ցավալի է այն, որ մեզ համար օրինակելի հոգևորականը, ում հավատում ենք, նման կերպ է վարվում: Եթե անդրադառնանք ընտրություններին, ապա ես հարգարժան նախագահին տեղեկացրել եմ դեպքերի զարգացման մասին, նա էլ ասել է, որ իրավիճակը շատ է ձգձգվել, և որ իրավացի ենք: Պետք է ընտրություններն անցկացնենք հանրաքվեից հետո` առանց միմյանց նեղացնելու, հաշտ ու խաղաղ, որովհետև համայնքը պառակտվում է: Պետք է համախմբված լինենք և ճշմարտությունն ասենք: Ինձ մեկ ուրիշ հարց է հուզում. որոշ ընկերներ ասում են, թե «Պետրոսը չի թողում` ընտրությունները կայանան: Ես ի՞նչ կապ ունեմ: Նման իրավիճակում ես պետք է անկողմնակալ լինեմ: Ժողովրդին մոլորեցնելու իրավունք չունեմ: Յուրաքանչյուրն ինքն է որոշում կայացնելու, և այդ որոշումը հարգվելու է: Այո՛, ընտրությունները ձգձգվեցին, բայց մեղավորը ոչ թե պետությունն է, այլ` մենք: Սահակ Սրբազանը շատ լավ հոգևորական է, բայց եթե այդքան անիրավություններ կային, ինչու՞ է այսքան սպասել, թե՞ ուշ է զարթնել: Ես սիրում եմ հոգևորականներին, սակայն համայնքն ինչ ասի, այն էլ լինելու է:

«Հրաժարականը ճիշտ է»
Հարուն Քեչեջիօղլու

Կարծում եմ` հրաժարականը ճիշտ է և անհրաժեշտ, սակայն նրա նամակում որոշակի թերություններ կային: Չպետք է համայնքի հետ նման ձևով խոսեր:

«Պետք է տեր կանգնել»
Մանուկ Օղեր՝ Ֆերիքյոյի Սուրբ Վարդանանց եկեղեցու հիմնադրամի նախագահ

Սահակ Սրբազանի հրաժարականը իրոք ցավալի է: Հսկայական Թուրքիայի Հանրապետությունում երկու սրբազան ունենք, որից մեկն էլ հրաժարական է տալիս: Պետք է վերացնել պատճառները, որոնք հանգեցրել են դրան: Պետք է Սահակ Սրբազանի պես հարգարժան մեկին չթողնել, որ հեռանա, պետք է տեր կանգնել:

«Ոչ ոք Սահակ Սրբազանի պես հեռատես չգտնվեց»
Խոսրով Քյոլեդավիթօղլու՝ Նախաձեռնող հանձնաժողովի փոխնախագահ

Այսքան անհեռատեսության մեջ ուրախալի է, որ գոնե մի հեռատես մարդ գտնվեց: Նման իրավիճակում, երբ բազում պարտականություններ ունեցող այսքան մարդիկ ոչինչ չեն ձեռնարկել, Սահակ Սրբազանը մշտապես փորձել է կատարել իր պարտականությունները, սակայն տարատեսակ սպառնալիքների հետևանքով չի կարողացել կատարել: Սրբազանը նշում է, որ նման քայլի դիմել է՝ այլևս չկարողանալով տանել Արամ Սրբազանի քայլերը: Սա արդեն իսկ վկայում է, որ իրավիճակը կրիտիկական աստիճանի է հասել: Այսքան անհեռատես մարդկանց մեջ Սահակ Սրբազանի քայլը հարգանքի է արժանի, քանի որ ոչ ոք այսքան սպառնալիքների պարագայում ոչինչ չի կարող ձեռնարկել: Ես մտածում էի, որ ուրիշ հոգևորականներ հրաժարական կտան, սակայն ոչ ոք Սահակ Սրբազանի նման հեռատես չգտնվեց: Ըստ էության, հրաժարականը ևս լուծում չէ, ժողովուրդը պետք է որոշակի քայլերի դիմի, որովհետև իրավասու ղեկավարների հնարավորությունները սահմանափակ են: Այս իրավիճակից դուրս գալու համար ժողովուրդն այլևս պետք է ասի` «Սա իմ ընտրությունն է»: Բավարար չէ նաև Նախաձեռնող հանձնաժողովը, որը պատասխանատու է, սակայն լիազորություններ չունի, որովհետև մեզ մոտ որևէ մեկը, ով ներդրում չի կատարել, որևէ կազմակերպություն, որտեղ ներդրում չի կատարվել, չի կարող աշխատել:

«Պետք է որոշում կայացվի»
Թորոս Ալջան՝ Փոքրամասնությունների հիմնադարամների ներկայացուցիչ, Հիմնադրամների խորհրդի անդամ

Շատ ցավալի դեպք է… Մեծ ժողով է գումարվելու, որի ժամանակ քննարկվելու են պատրիարքական ընտրությունները, Սահակ Սրբազանի չափազանց խիստ նամակը և նամակում տեղ գտած քննադատություններն ու մեղարանքները: Կարծում եմ՝ անհրաժեշտ է այդ քննարկման ժամանակ գործողությունների հետագա ընթացքը համակարգող ծրագիր մշակել: Կարծում եմ՝ մինչև որոշում չկայացնեն, ոչ ոք չպետք է լքի դահլիճը, պետք է հարգանք ցուցաբերեն: Կայացված որոշումն անպատճառ իրականցնելու ենք, եթե շատ խիստ քննադատություններ չունենանք: Սակայն եթե այնպիսի որոշում կայացնեն, որը չկարողանանք ընդունել, անհրաժեշտության դեպքում մեր մեկնաբանությունը կկատարենք:

«Չեմ հասկանում, թե գործընթացն ինչու՞ է ձգձգվում»
Մելքոն Քարաքյոսե՝ Սամաթիայի Սուրբ Գևորգ եկեղեցու հիմնադրամի պատվավոր նախագահ

Այս ութամյա ժամանակահատվածն ինձ ընդհանրապես հաճելի չէ: Ամեն օր ինքս ինձ մեղադրում եմ, հարցնում եմ՝ մենք դեպի ուր ենք գնում: Մենք Ստամբուլի փոքրամասնություններից ամենալավ կազմակերպված համայնքն էինք, սակայն, ցավոք, այս ութ տարվա ընթացքում սկսեցինք հետ գնալ: Յուրաքանչյուրը շարժվում է` խելքին փչածի պես: Սակահ Սրբազանի հրաժարականն էլ դրա հետևանքն է: Սակայն Սահակ Սրբազանի նման հոգևորականի զբաղեցրած դիրքը նման հրաժարականի արժանի չէ, քանզի Սահակ Սրբազանն իրոք հրաշալի կրթություն ստացած հոգևորական է, ով հետևորդներ ունի: Ինչպես որ այս ութ տարվա գործընթացն է սխալ, այնպես էլ Սրբազանի հրաժարականը: Ինչպես ասում է, շատ վատ բաների միջով է անցել, մենք դա հաշվի ենք առնում: Կարծում եմ` այդ ութ տարին հաղթահարել ենք, շատ քիչ է մնացել, որ համբերենք, քանի որ Պ. Շիրինօղլուն Անկարայում ճիշտ է խոսել: Սահակ Սրբազանը գիտեր, թե այնտեղ ինչ են խոսել: Հետևաբար նրա նման արարքը անձամբ տարօրինակ և սխալ եմ համարում, ենթադրում եմ, որ հրաժարականը հետ կվերցնի: Արամ Սրբազանն այս համայնքի համար շատ բան է կատարել: Նրան ենք պարտական Աղթամարի և Դիարբեքիրի եկեղեցիների բացումը, սակայն չեմ հասկանում, թե ինչու՞ է այս գործընթացն այսքան ձգձգվում: Սփյուռքի հայերն էլ են շատ քննադատել: Ես այս նամակից հասկանում եմ, որ Սահակ Սրբազանի հետ իր ընկերներն են սխալ վարվել:

«Գնալը ճիշտ չէ»
Մեսութ Օզդեմիր՝ Բաքըրքյոյի Ծնունդ Սուրբ Աստվածածնի եկեղեցու հիմնադրամի նախագահ

Շատ տխրեցի: Շատ տխրեցինք, որ նման մեթոդի է դիմել: Ըստ էության, Սրբազանի ելույթներում մեզ ուղղված մեղադրական արտահայտություններ կային: Չեմ ուզում անդրադառնալ պատրիարքական ընտրություններին, սակայն մարդկային և խղճի գործոն կա, որը շատ է անգանգստացնում ինձ: Պետք է պահ առաջ այս իրավիճակից դուրս գալ, քանզի իրոք որ Ստամբուլը նման հոգևորականի կարիք ունի: Չեմ կարծում, որ ճիշտ է՝ միանգամից «բարկացա» ասելն ու հեռանալը: Կարծում եմ՝ Սրբազանն ու մյուս հոգևորականներն իրավիճակը հանգիստ կերպով կգնահատեն:

http://www.agos.com.tr/tr/yazi/17734/masalyanin-gitmesi-kayip-olur

Թարգմանեց Անահիտ Քարտաշյանը

Akunq.net