Մեջլիսի հայազգի պատգամավոր Սելինա Դողանը հիշեցրել է Թուրքիայի իշխանություններին հանրաքվեի և Զատկի տոնի օրվա համընկման մասին

Թուրքիայի ընդդիմադիր Ժողովրդահանրապետական կուսակցության անդամ, Մեջլիսի հայազգի պատգամավոր Սելինա Դողանը հիշեցրել է Թուրքիայի իշխանություններին, որ ծրագրված սահմանադրական փոփոխությունների հանրաքվեն համընկնում է Հայ Առաքելական եկեղեցու հետևորդների կողմից նշվող Սուրբ Հարության տոնի օրվան:

Հայ կին պատգամավորն ուշադրություն է հրավիրել այն փաստի վրա, որ ապրիլի 16-ին կայանալիք հանրաքվեին մասնակցելու հարցում Ստամբուլի կղզիներում բնակվող քրիստոնյա հայ համայնքի ներկայացուցիչները իրենց ձայնն օգտագործելու հարցում դժվարությունների կարող են հանդիպել և խնդրել է, ուսումնասիրելով հարցը, հաշվի առնել այդ հանգամանքն ու համայնքի ներկայացուցիչների համար համապատասխան հարմարություններ ստեղծել՝ ձայնի իրենց իրավունքն օգտագործելու համար:

Այս մասին Tert.am-ին հայտնել են Դողանի մամուլի ծառայությունից:

Հիշեցնենք, որ ավելի վաղ Թուրքիայի ընդդիմադիր Ժողովրդադեմոկրատական կուսակցության անդամ, խորհրդարանի հայազգի պատգամավոր Կարո Փայլանը Twitter-ի իր պաշտոնական էջում գրառում է կատարել, որտեղ հիշեցրել է Թուրքիայի բնակիչներին, որ այս տարի Հայ առաքելական եկեղեցու հետևորդները Սուրբ Հարության տոնը նշելու են ապրիլի 16-ին և կոչ է արել երկրի իշխանություններին սահմանադրական փոփոխությունների վերաբերյալ հանրաքվեի ամսաթվի շուրջ որոշում կայացնելուց առաջ հաշվի առնել այս փաստը:

Նշենք, որ հունվարի 21-ին Թուրքիայի խորհրդարանը ձայների մեծամասնությամբ հավանություն է տվել Սահմանադրությունում փոփոխությունների իրականացման փաթեթին, որն առաջարկում է անցում կատարել կառավարման նախագահական համակարգին: 18 հոդվածից բաղկացած օրենքի ընդունմանը կողմ է քվեարկել 339 պատգամավոր:

Էրդողանը պնդում է Թուրքիայում կառավարման նախագահական համակարգի սահմանման հարցում՝ խորհրդարանականի փոխարեն, որը երկրում գործում է 1923-ին Թուրքիայի Հանրապետության կազմավորման սկզբից ի վեր:

Սահմանադրական փոփոխությունների հարցով հանրաքվեն կանցկացվի ապրիլի 16-ին։

http://www.tert.am/am/news/2017/02/18/selina-dogan/2283178